धनकुटा । धनकुटामा जारी वाईवाई सहिद रिदामाहाङ रामालिहाङ आठपहरिया महिला गोल्डकप फुटबल प्रतियोगिताको फाइनलमा विभागीय टीम त्रिभुवन आर्मी क्लव काठमाण्डौ पुगेको छ । आर्मीले दोस्रो सेमिफाइनल खेलमा रौतहट फुटबल क्लवलाई शून्यका विरुद्ध ६ गोल गरेको छ ।
किरात आठपहरिया समाजको आयोजनामा जारी प्रतियोगिताको पहिलो हाफमा आर्मी क्लवले ४ गोल र दोस्रो हाफमा २ गरेको थियो ।
आर्मीले खेलको पहिलो हाफको २ मिनेटमै गोलको खाता खोलेको थियो । पहिलो गोल आर्मी क्लवकी शर्मिला थापा मगरले गरेकी थिईन् । त्यसको लगत्तै अर्को मिनेटमा आर्मीकै रश्मी कुमारी घिसिङ गोल थपिन् । यस्तै खेलको २३ मिनेटमा पुनः शर्मिला थापा मगरले अर्को गोल गर्दै गोल अन्तरलाई बढाईन् । त्यसपछि ३४ औँ मिनेटमा सपना लामाले थप गोल गरेर चार गोलको फराकिलो अन्तर बनाईन् ।
त्यसैगरी दोस्रो हाफको चौथो मिनेटमै विमला चौधरी गोल गरिन् । यस्तै दोस्रो हाफकै ३३ औं मिनेटमा इन्दिरा राईले गोल गरेर रौतहटलाई आधा दर्जन गोल संख्या पुराईन् । खेलमा अधिकांश बल आर्मीको कब्जामा थिए । रौतहटले आक्कलझुक्कल मात्र आर्मीको पोष्टमा आक्रमण गरेका थिए ।
सो खेलको वुमन अफ दि म्याच त्रिभुवन आर्मी क्लबकी विमला चौधरी घोषित भइन् । उनलाई धनकुटा नगरपालिकाका प्रमुख प्रशासकीय अधिकृत रामबहादुर थापाले नगद ३ हजार रुपैयासहित ट्रफ प्रदान गरे ।
प्रतियोगिताको अहिलेसम्मको खेलका पराजित टिमले गोल गर्न सकेको छैन । एपीएपल र नेपाल प्रहरीवीच भएको खेलमा एपीएफकै खेलाडीले आत्मघाती गोल गरेर २ १ को अन्तरले जितेका थिए ।
मोफसलमा पहिलो पटक आयोजना गरिएको यो प्रतियोगिताको फाइनल खेल भोली शुक्रबार दुवै विभागीय टीमहरु त्रिभुवन आर्मी र सशस्त्र प्रहरी क्लब काठमाडौ वीच हुने छ । प्रतियोगिताका विजेता तथा उपविजेता टिमले क्रमशः नगद दुई लाख र एक लाख रुपैयासहित ट्रंफी, प्रमाणपत्र प्राप्त गर्ने आयोजक समितिका संयोजक सन्देश आठपहरियाले जानकारी दिए ।
यो प्रतियोगितामा विभागीय टीमको बश्चश्व देखियो । विभागीय टिमको अगाडि अन्य टिम निरिह बन्न पुग्यो ।
यो प्रतियोगितामा ३ विभागीय टिमसहित ८ टीमको सहभागिता रहेको थियो । जसमा आयोजक धनकुटासहित रौतहट, मोरङ, बराहक्षेत्र सुनसरी सहभागी भएका छन् ।