धनकुटा । धनकुटामा सम्पन्न दोस्रो रिदामाहाङ–रामलिहाङ तथा प्रथम वाईवाई महिला गोल्डकप फुटबल प्रतियोगिताको उपाधि विभागीय क्लब त्रिभुवन आर्मी काठमाडौले जितेको छ । आर्मीले फाइनल खेलमा अर्को विभागीय क्लव सशस्त्र प्रहरी बलको एपिएफ क्लवलाई पेनाल्टी सुट आउटमा ३–१ गोलले पराजित गर्दै आर्मी च्याम्पियन बनेको हो ।
अहिलेसम्म महिला फुटवलको इतिहासमा आर्मीले एपीएफलाई पराजित गर्न सकेको थिएन । यो प्रतियोगितामा आर्मीले इतिहास रचेको छभने एपीएफको जितमा ब्रेक लागेको छ ।
खेल शुरु देखिनै बर्षाले प्रभावित भएको थियो । दुवै टिमले निर्धारित समयमा कुनैपनि गोल गर्न सकेन । दुवै टिमले गोल गर्ने अवसर पाएपनि बललाई गोलमा परिणत गर्न भने सकेन ।
निर्धारित समयमा गोलरहित भएपछि खेल ट्राईब्रेकमा गएको थियो । पेनाल्टीमा आर्मीका रस्मी घिसिङ, पुजा राना मगर र निशा बोहोराले गोल गरे । यता एपीएफकी मञ्जु दोङले मात्र आफ्नो प्रहार गोलमा परिणत गर्न सफल भईन् । एपीएफका स्ट्राईकर राष्ट्रिय खेलाडी सावित्रा भण्डारीले प्रहार गरेकी पहिलो वल पोष्टबाट बाहिरियो । यस्तै गीता रानाको प्रहार पनि बाहिरिएको थियो । यस्तै अनिता बस्नेतको प्रहार पोलमा लागेर फर्किएको थियो ।
जितपछि प्रतिक्रिया दिँदै आर्मीमा प्रशिक्षक चक्र तामाङले खेलाडीको कडा मेहनतका कारण पहिलो पटक एपीएफलाई पराजित गर्दै इतिहास रच्न सफल भएको प्रतिक्रिया दिए । यता पराजित एपीएफका प्रशिक्षक जनक सिंहले वर्षाका कारण पराजय हुनु परेको प्रतिक्रिया दिए ।
उपाधिसँगै त्रिभुवन आर्मीले नगद दुइ लाख सहित ट्रफी, प्रमाणपत्र प्राप्त गरेका छन् । यस्तै उपविजेता एपीएफले एक लाख नगदसहित ट्रफी, प्रमाणपत्रमा चित्त बुझाउन वाध्य भए । फाइनल खेलको वुमन अफ द म्याच आर्मीकी पुजा राना मगर घोषित भइन् ।
प्रतियोगितामा एपीएफकी सावित्रा भण्डारी सर्वोत्कृष्ट खेलाडी घोषित भइन् । उत्कृष्ट फरवार्ड आर्मीकी रस्मी घिसिङ, मिडफिल्डर एपीएफकी रेनुका नगरकोटी, डिफेण्डरमा एपीएफकी गीता राना भईन् । यस्तै गोलरक्षकमा आर्मीकी अञ्जना रानामगर, सर्वोत्कृष्ट गोलकर्तामा सात गोलसहित आर्मीकी शर्मिला थापा मगर र उदयमान खेलाडीमा आयोजक धनकुटाकी सुष्मिता राई घोषित भईन् । त्यस्तै उत्कृष्ट प्रशिक्षक आर्मीका चक्र तामाङ घोषित भए ।
विजेता तथा उपविजेता टोलीलाई धनकुटा नगरपालिका प्रमुख चिन्तन तामाङ, उपप्रमुख शकुन्तला बस्नेत, प्रमुख जिल्ला अधिकारी डा. कृष्णबहादुर घिमिरेलगायतले पुरस्कार तथा ट्रफी प्रदान गरेका थिए । यही पुस १३ गतेदेखि सञ्चालन भएको प्रतियोगितामा तीन विभागीय टोलीसहित ८ टिमको सहभागिता थियो ।
प्रतियोगिताको फाईनल खेल आयोजक समितिका संयोजक सन्देश आठपहरिया राईको अध्यक्षतामा सम्पन्न भएको थियो ।
