धनकुटा २६ पौष । नेपाली कांग्रेसको सातै स्थानीय तहमा एकैसाथ सम्मेलन सम्पन्न भएको छ । यसैक्रममा धनकुटा नगर सभापति रोशन श्रेष्ठको अध्यक्षतामा नगर सम्मेलन सम्पन्न भयो । सो सम्मेलनमा महासमिति सदस्य आनन्दसन्तोषी राईले सरकार जनताको आवश्यकता परिपूर्ति गर्न भन्दा आफ्नै खोजी भर्न तल्लिन रहेको आरोप लगाए । उनले अब कांग्रेसले सबैको साथ र सहयोगबाट मुलुकको विकास गर्ने बताए । सो अवसरमा जिल्ला सदस्य गोविन्द वाग्लेलगायत नगरका १० वटै वडाका वडा सभापतिहरुले वडाको अवस्था र आगामी दिनमा गर्नुपर्ने योजनाका वारेमा जानकारी गराएका थिए ।
यस्तै पाख्रिवास नगरपालिकामा एक घर एक क्रियाशील सदस्य बनाउने निर्णय गर्दै नेपाली कांग्रेसको पाख्रिवास नगर सम्मेलन सम्पन्न भएको छ । नगरभित्र एक घर एक क्रियाशील सदस्य बनाउने अभियान संचालन गर्दै संगठनलाई सशक्त र सुदृढीकरण गर्ने सम्मेलनले निर्णय गरेको हो ।
सो सम्मेलनको कांग्रेस जिल्ला सचिव तथा नेपाल प्रेस युनियनका केन्द्रिय उपाध्यक्ष विजयसन्तोषी राईले उद्घाटन गरेका थिए । उनले वर्तमान सरकार जनचाहनाअनुसार काम गर्न नसकेको विरोध आमसञ्चारमाध्यममा आएकोले तर्सिएर मिडिया काउन्सिल विधेयक ल्याएर जनताका सूचनाको अधिकार कुंठित गर्न लागि परेको आरोप लगाए । उनले कांग्रेसको नेतृत्वमा राजनीतिक क्रान्ति पुरा भएको उल्लेख गर्दै कांग्रेसले अब आर्थिक क्रान्तिको पनि नेतृत्व गर्ने बताए ।
पार्टी नगर कार्यसमितिका सभापति कोपिन मानन्धरको अध्यक्षतमा सम्पन्न सम्मेलनमा जिल्ला सदस्यहरु ज्ञानु गुरुङ्ग, जयन्द्र घिसिङ्ग, शिक्षक संघमा पूर्व अध्यक्ष विश्वनाथ दाहाल, कांग्रेस क्षेत्रीय सचिव हरिबहादुर राई, महिला संघका उपाध्यक्ष अम्विका धमला, तरुण दलका उपाध्यक्ष युवराज पराजुलीले शुभकामना मन्तव्य राखेका थिए । उनीहरुले नेपाली कांग्रेसलाई अब पाख्रिवासमा मात्र नभई जिल्लामै गुट राजनीतिलाई त्यागी नयाँ ढंगबाट संगठन विस्तार र सुदृढीकरण गर्दै सशक्त बनाउनु पर्ने बताएका थिए ।
सम्मेलनमा स्वागत मन्तव्य नगर उपसभापति प्रेम भण्डारीले र संचालन सचिव चन्द्र बस्नेतले गरेका थिए । सम्मेलनमा नगरका १० वटै वडाहरुका सभापतिहरुले वडामा संगठनको स्थिति र नयाँ क्रियाशील सदस्यता वितरणका वारेमा अवगत गराएका थिए ।
सो समारोहमा नेकपालगायत विभिन्न पार्टी परित्याग गरी कांग्रेसमा प्रवेश गर्ने राजेन्द्र महरालगायत एक दर्जन बढीलाई फुल माला र टिका लगाई स्वागत गर्दै कांग्रेसको सदस्यता प्रदान गरेका थिए । यस नगरमा केहि महिनादेखि विभिन्न पार्टी परित्याग गरी प्रवेश गर्नहरुको संख्या २ सय २७ जना भएको जिल्ला सदस्य ज्ञानबहादुर गुरुङ्गले जानकारी दिए ।
यसैगरी महालक्ष्मी नगर सम्मेलनको अवसरमा जिल्ला सभापति अग्नीप्रसाद पौडेले सरकारको रवैयाबाट जनतामा निरासा छाएकोले कांग्रेसले जनचाहना अनुसार संगठन विस्तार गर्न लाग्नु पर्ने बताए ।
नगर सभापति ध्रवराज रायको सभापतित्मवमा सम्पन्न सम्मेलनको संचालन सचिव शिव विकले गरेका थिए । कार्यक्रममा जिल्ला सदस्यहरु खेम पौडेल, राजेन्द्र पौडेल, राजेन्द्र खड्का, पूर्व जिल्ला सदस्य गजेन्द्र पौडेललगायतले सुझाव दिएको सचिव परिवर्तनराज पौडेलले बताए ।
यसैगरी चौविसेममा सम्पन्न सम्मेलनमा कांग्रेस जिल्ला कोषाध्यक्ष दिनेश राई वर्तमान सरकार तीनै तहमा बहुमत प्राप्त गरेको दम्भले अधिनायकवाद तर्फ उन्मुख भएको आरोप लगाए । सो अवसरमा शिक्षक संघ १ नम्वर प्रदेशका उपाध्यक्ष गंगाराम ढुङ्गाना, महासमिति सदस्यहरु दुर्गा सुवेदी, ललित चम्जोङ्ग, जिल्ला सदस्यहरु दवेन्द्र श्रेष्ठ, चन्द्र श्रेष्ठ, बखत भट्टराई, पूर्व जिल्ला सदस्य पदम याम्फु, शिक्षक संघ अर्थ सचिव रोहणी पाण्डेलगायतले अब कांग्रेसले चौविसे क्षेत्रको संगठनलाई विस्तार र सुदृढीकरण गर्ने प्रतिवद्धता जनाएका थिए ।
सो सम्मेलन कांग्रेस चौविसे गाउँपालिका सहसभापति मेघबहादुर थापाको अध्यक्षतमा सम्पन्न भएको थियो ।