धनकुटा । नेपालमा विपत् व्यवस्थापन क्षेत्रमा सशस्त्र प्रहरी वल अग्रस्थानमा पर्छ । यस कार्यमा सहयोग पुगोस् भनि माछापुच्छ्रे्र बैंक धनकुटाले सशस्त्र प्रहरी वल छिन्ताङ्ग गुल्म धनकुटालाई विपत् व्यवस्थापनका लागि चाहिने आवश्यक सामग्रीहरु एक समारोहका वीच हस्तान्तरण गरेको छ ।
बैंकको सामाजिक उत्तरदायित्व कार्यक्रम अन्तर्गत सशस्त्र वलले गर्दै आएको विपत् व्यवस्थापनमा थप सहयोग पुगोस् भन्ने उद्देश्यले उद्धारका लागि आवश्यक सामग्रीहरु प्रदान गरेको बैंकले जनाएको छ । सो सामग्री हस्तान्तरण कार्यक्रममा सशस्त्र प्रहरी वलका सशस्त्र प्रहरी नायव उपरीक्षक सचिन कर्माचार्यले बलले राष्ट्र र जनताको जिउधनको सुरक्षालाई सर्वोपरी ठान्दै आएको जानकारी दिए । उनले वलले आफ्नो जिम्मेवारीलाई सकेसम्म उत्कृष्ट एवं व्यावसायिक ढंगबाट निर्वाह गर्दै आएको बताए । उनले सशस्त्र प्रहरी वल विपत्को अवस्थामा तत्काल उद्धार गर्ने कार्यमा थप सशक्त रुपमा भूमिका निर्वाह गर्ने प्रतिवद्धता जनाए । उनले सशस्त्र प्रहरी वलले विपत्का क्षेत्रमा उद्दार गर्न विभिन्न तालिमहरु सञ्चालन गर्दै आएके जानकारी दिए ।
सोही अवसरमा माछापुच्छ्रे बैंकका शाखा प्रवन्धक गोविन्द श्रेष्ठले देशमा आईपर्ने दैवीप्रकोप होस् वा अन्य जुनसुकै आपतविपत्मा सशस्त्र प्रहरी वलले गरेका उद्दार तथा राहत कार्यको प्रशंसा गर्दै आगामी दिनमा थप सहयोग पुगोस् भन्ने उद्देश्यले विपत् व्यवस्थापनका सामग्री हस्तान्तरण गरेको जानकारी दिए ।