धनकुटा । अहिले नेपाली समाजमा पाश्चात्य संस्कृति अवलम्वन गर्नेहरुको संख्या बढ्दैछ । यसले हिन्दु सनातन संस्कृति बेवास्ता गर्नेहरुको संख्या बढिरहेको भन्दै बालबालिकाहरुलाई हिन्दू धर्म तथा संस्कृति स्वअध्ययनमा प्रोत्साहन गर्न थालिएको छ ।
हिजो सोमबार हिन्दु स्वयम्सेवक संघ धनकुटाले तल्लो टुडिखेलमा आयोजना गरिएको विद्यार्थी ज्ञान परीक्षामा हिन्दुसंस्कृतिका शास्त्रीय ज्ञान परीक्षण गरियो । जिल्लाका निजी तथा सामुदायिक २१ विद्यालयका ५ सय ८० विद्यार्थीले स्वामी विवेकानन्द सँस्कृति ज्ञान हिन्दु संस्कृतिका बारेमा १५ दिनको स्वअध्ययन गर्न दिईएका थिए । यसरी स्वअध्ययन गर्नेहरुलाई हिजो परीक्षा लिईएको थियो । स्वअध्ययन गर्नेहरुवीच सहभागी गराई उत्कृष्ट नतिजा ल्याउनेलाई पुरस्कारकोसमेत व्यवस्था गरिएको हिन्दु स्वयम्सेवक संघ धनकुटाका अध्यक्ष विश्वनाथ दाहाले जानकारी दिए ।
अध्यक्ष दाहालका अनुसार १ सय रुपैंया प्रबेश शुल्क तिरेपछि १५ दिन अघि नै सहभागी विद्यार्थीले स्वामी विवेकानन्द सँस्कृति ज्ञान परीक्षा नामक पुस्तक पाएका थिए । कक्षा ६ देखि कक्षा १२ सम्म अध्ययनरत विद्यार्थीहरुलाई परीक्षाको समयमा दिवाखाजाको व्यवस्थापन गरिएको दाहालले बताए ।
परीक्षामा ५० पुर्णाङ्क बस्तुगत विषयका प्रश्नहरु सोधिएका थिए । परीक्षामा सहभागीहरु मध्ये गोकुण्डेश्वर बालमन्दिर मावि धनकुटा ५ का मनिष ओझा प्रथम भए । यस्तै शितलादेवी मावि पाख्रिीवासका सम्झना यादव दोस्रो र भाषा माविका बिना राई तेस्रो भएका थिए ।
सो परीक्षामा सम्मिलितहरुमध्ये ९ जनाले सान्तवना पुरस्कार प्राप्त गरेका आयोजक सस्थाका सदस्य दामोदर मिश्रले जानकारी दिए । जिल्लाका ७ स्थानीय तहमा नै हिन्दु स्वयम्सेवक संघ गठन भईसकेका कारण ग्रामीण क्षेत्रमा समेत ज्ञान परीक्षा गराउने तयारी भईरहेको अध्यक्ष दाहालले जानकारी दिए ।