धनकुटा २१ माघ । नेपाल नेत्रज्योती संघ धनकुटाले पूर्वराज्यमन्त्रीसहित तीनजनालाई सम्मान गर्ने निर्णय गरेको छ । संघले डा. रामप्रसाद पोखरेल आँखा अस्पताललाई साधनस्रोत सम्पन्न बनाउन महत्वपूर्ण सहयोग गरेको भन्दै सम्मान गर्ने जनाएको छ ।
संघका अध्यक्ष रोशेष श्रेष्ठको अध्यक्षतामा सम्पन्न भएको बैठकले संघलाई एम्बुलेन्स खरिद गर्न आर्थिक सहयोग गरेकोमा पूर्वराज्यमन्त्री तथा संविधानसभा सदस्य धनमाया विकलाई सम्मान गर्ने जनाएको छ । यस्तै भवन निर्माण गर्न मन्त्रालयबाट रकम विनियोजन गर्न महत्वपूर्ण सहयोग गरेका साविक शान्ति तथा पुनर्निर्माण मन्त्रालयका तत्कालीन सचिव धरणीधर खतिवडालाई र संघ र अस्पताललाई संस्थागत विकास गर्न महत्वपूर्ण योगदान दिएकोमा संघका निर्वमान अध्यक्ष द्रोर्ण गुरागाईलाई सम्मान गर्ने निर्णय गरेको प्रचारप्रसार समिति तथा शिविर समन्वय तथा व्यवस्थापन समितिका संयोजक विजयसन्तोषी राईले जानकारी दिए ।
यहि माघ २७ गते हुन गैरहेको संघको ११ औं साधारण सभामा तीनै जनालाई सम्मान गर्ने भएको हो । साधारण सभालाई सफल बनाउन उसिमितिसमेत गठन गरिएको छ । प्रकाश श्रेष्ठ संयोजक र रेणु श्रेष्ठ सदस्य रहेको स्वागत समिति र सुनिल डंगोल संयोजक र जयन्द्र प्रधान सदस्य रहेको आवास तथा भोजन समिति गठन गरेको संघका अध्यक्ष रोशेष श्रेष्ठले जानकारी दिए ।