धनकुटा २७ माघ । आँखा उपचार सेवालाई अझ प्रभावकारी र गुणस्तरीय बनाउँदै पूर्वी पहाडकै आँखा उपचार केन्द्रका रुपमा विकास गर्नेलगायतका निर्णयहरु गरेको छ । सो निर्णय नेपाल नेत्रज्योती संघ धनकुटाको ११ औं साधारण सभामा गरिएको हो ।
संघको साधारणसभाको एक कार्यक्रमका वीच १ नं. प्रदेशका सांसद निरन राईले उद्घाटन गरेका थिए । सो अवसरमा प्रमुख अतिथि सांसद राईले राज्यले कम लगानी गर्दा पनि आँखा उपचारका क्षेत्रमा नेत्रज्योती संघले दिईरहेको सेवाको प्रशंसा गरे । उनले राज्यले यो क्षेत्रमा पनि प्राथमिकता दिनुपर्ने बताउँदै संघले धनकुटामा संचालन गरिरहेको आँखा उपचार सेवालाई गुणस्तरीय र प्रभावकारी बनाउन आफ्नोतर्फबाट सक्दो सहयोग गर्ने आश्वासन दिए ।
कार्यक्रममा संघका केन्द्रिय अध्यक्ष प्रा. डा. चेतराज पन्तले आँखा उपचार सेवालाई देशका सबै स्थानीय तहसम्म विस्तार गर्न पहल भैरहेको जानकारी दिए । उनले यसकालागि सरकारले पनि सहयोग गर्नुपर्ने बताए ।
सो अवसरमा संविधानसभा सदस्य मनोहरनारायण श्रेष्ठले जिल्लामा स्वास्थ्यसेवाको अवस्था झन झन खस्केको भन्दै सेवा विस्तारका लागि पहल गर्न सांसद तथा जिल्ला समन्वय समितिका प्रमुख टंक चुवानलाई आग्रह गरे । यस्तै जिल्ला समन्वय समितिका प्रमुख टंक चुवानले संघले पूर्वी पहाडी क्षेत्रमै आँखा उपचारका क्षेत्रमा गरिरहेको सेवाको प्रशंसा गरे । कार्यक्रममा संघका केन्द्रिय महासचिव भरतबहादुर चन्द, १ नं. प्रदेशका अध्यक्ष श्यामसुन्दर उदास, नेपाल पत्रकार महासंघका अध्यक्ष राजेश्वरबहादुर श्रेष्ठलगायतले संघले प्रदान गरिरहेको सेवाको प्रशंसा गर्दै अझ थप विस्तार र प्रभावकारी बनाउँदै धनकुटाको हावापानी मौसम अनुकुल रहेकोले भारतबाटसमेत उपचार गराउन आउने गरी गुणस्तर बृद्धिमा ध्यान दिनु पर्ने सुझाव दिए । उनीहरुले आँखा संवेदनशील अंग भएकाले सेवा विस्तारका लागी सरोकारवाला निकाय, सरकार र स्थानीयवासीले समेत सहयोग गर्नु पर्नेमा जोड दिए ।
संघका जिल्ला अध्यक्ष रोशेष श्रेष्ठको अध्यक्षतमा सम्पन्न भएको सो सभामा शाखाको वार्षिक प्रतिवेदन र भावी कार्यक्रम शाखाका सदस्य विजयसन्तोषी राईले र आर्थिक प्रतिवेदन शाखाका कोषाध्यक्ष पुरेन्द्रलाल श्रेष्ठले प्रस्तुत गरेका थिए । कार्यक्रममा स्वागत मन्तव्य डा. रामप्रसाद पोखरेल आँखा अस्पताल व्यवस्थापन समितिका अध्यक्ष लिलानाथ मिश्रले र सञ्चालन ज्योती प्रधानले गरेका थिए ।
सो अवसरमा एम्बुलेन्स खरिद गर्न विशेष सहयोग गरेको भन्दै पूर्व शिक्षा राज्यमन्त्री धनमाया विकलाई सम्मान गरिएके थियो । यस्तै संघको भवन निर्माण गर्न शान्ति तथा पुनर्निर्माण मन्त्रालयबाट बजेट बिनियोजन गर्न महत्वपूर्ण सहयोग गरेको भन्दै मन्त्रालयका तत्कालीन सचिव धरणीधर खतिवडा र संघलाई साधन स्रोत सम्पन्न बनाई वर्तमान अवस्थामा ल्याउन महत्वपूर्ण भूमिका निर्वाह गरेको भन्दै शाखाका पूर्वसभापति तथा वर्तमान केन्द्रिय कोषाध्यक्ष द्रोण गुरागाईलाई सम्मान गरिएको थियो । सम्मानित व्यक्तित्वहरुलाई शाखाको तर्फबाट सांसद राई, केन्द्रिय अध्यक्ष प्रा.डा. पन्त र शाखा सभापति श्रेष्ठले सम्मानपत्रसहित सम्मान गरेका थिए ।
सभाले संघबाट संचालित अस्पताललाई थप साधन स्रोत सम्पन्न बनाई गुणस्तरीय र प्रभावकारी सेवा विस्तार गर्दै धनकुटालाई आँखा उपचार सेवाका लागि पूर्वी पहाड कै केन्द्र बनाउने निर्णय गरेको छ । सभाले महालक्ष्मी नगरपालिकाको जितपुरमा र चौविसे गाउँपालिकाको राजारानीमा आँखा उपचार केन्द्र स्थापना गर्ने, ओ.ए. कक्षा संचालन गर्ने, सबै पालिकासँग सहकार्य र समन्वय गरी आँखा उपचार सेवा संचालन गर्ने, आँखा उपचार सेवालाई टोल टोलमा सेवा विस्तार गर्नेलगायतका निर्णयहरु गरेको अध्यक्ष रोशेष श्रेष्ठले जानकारी दिए ।