पिङबुङ अन्तर क्लव फुटवलको उपाधी किरात क्लवको पोल्टामा

धनकुटा २७ माघ । साँगुरीगढीको वडा नं. ३ खुवाफोकमा संचालित अन्तरक्लव खुल्ला नकआउट फुटबल प्रतियोगिताको उपाधी किरात फुटबल क्लव बुढीमोरङ्ग धनकुटाले चुम्न सफल भएको छ । प्रतिस्पर्धात्मक फाईनल खेलमा देउराली युवा क्लव धरानलाई पेनाल्टी शुटआउटमा पराजित गर्दै उपाधी चुमेको हो ।
प्रतियोगिता पिङबुङ जनजागरण युवा समूह खुवाफोकको आयोजनामा सम्पन्न भएको थियो । विजेता तथा उपविजेता टिम र खेलाडीहरुलाई नगद, मेडल तथा प्रमाणपत्र नेपाली कांग्रेस धनकुटाका सचिव विजय सन्तोषी राई, धनकुटा निर्वाचन क्षेत्र (क) का सभापति जितेन्द्र रुम्दाली, कमोट फागो, आयोजक समितिका अध्यक्ष टेकप्रसाद लिम्बु, स्थानीय समाजसेवी कृष्ण लिम्बुले प्रदान गरेका थिए । कार्यक्रममा प्रमुख अतिथि सचिव राईले फुटवल खेलमा धनकुटाका खेलाडी किरण चेम्जोङ, सुजल श्रेष्ठलगायतले देशको नाम उँचो राखेको प्रसंग उल्लेख गर्दै अब गाउँ गाउँमा किरण र सुजल उत्पादन हुनु पर्ने बताए । उनले नेपालमा पनि खेलकुदबाट आर्थिक लाभ लिन सकिने अवस्था आएको बताउँदै व्यावसायिक खेलकुदको विकासमा जोड दिए ।
किरात र देउराली वीच भएको खेलमा निर्धारित समयमा दुवै टिमबाट एक÷ एक गोल गरी खेल वरावर भएपछि खेल ट्राईब्रेकरबाट निर्णय गरेको थियो । पेनाल्टी शुटआउटमा किरातले ५ र देउरालीले ४ गोलमात्र गर्न सफल भएको थियो । उपाधीसँगै किरातले नगद ६० हजार, ट्रफि र प्रमाणपत्र हासिल गरेका छन् । यस्तै उपविजेतामा चित्त बुझाउन वाध्य देउरालीले नगद ३० हजारसहित ट्रफि र प्रमाणपत्र हासिल गरेको छन् ।
प्रतियोगितामा धनकुटा, धरान र मोरंगका १० वटा क्लवहरुले भाग लिएका थिए । समापन कार्यक्रम समूहका अध्यक्ष टेकप्रसाद लिम्बुको अध्यक्षतामा सम्पन्न भएको थियो ।
कार्यक्रमको संचालन खगेन्द्र लिम्बु र जित लिम्बुले गरेका थिए । सो प्रतियोगिता माघ २३ गतेदेखि संचालन भएको थियो ।

Dhankuta News