धनकुटा चैत्र ९ । विश्वभर नोवेल कोरोना भाईरस (कोभिड–१९) ले आतंक मच्चाईरहेको छ । यसको जोखिम हर क्षेत्र परिरहेको छ । यसैक्रममा धनकुटामा आइपर्न सक्ने संक्रमणलाई सामना गर्नको धनकुटा नगरपालिका वडा नं. ६ स्थित औद्योगिकग्राममा क्वारेन्र्टान र आईसोलेशन वार्ड स्थापना गरिएको छ ।
साना उद्योग सञ्चालन गर्न घरेलु तथा साना उद्योग विकास समितिको १५ वटा खालि भवनमा सो कक्ष स्थापना गरिएको प्रमुख जिल्ला अधिकारी केशवप्रसाद विमलीले जानकारी दिए । झण्डै ४ वर्ष अघि निर्माण गरेको ग्राम उद्योग सचालन कार्यविधिको अभावमा कुनै उद्योग स्थापना हुन नसकी खाली रहेका छन् । ग्रामको खाली भवनहरुमा जिल्ला प्रशासन कार्यालयको पहलमा नेपाली सेना, नेपाली प्रहरी, सशस्त्र प्रहरी बल तथा स्थानीय सरोकारवालाहरुको सहयोगमा क्वारेन्टाईन र आईसोलेसन कक्ष स्थापना गरिएको छ ।
हाललाई औद्योगिक ग्रामको ११ वटा भवनमा ६० वटा क्वारेन्टाइन बेड र १२ वटा आइसोलेसन बेड स्थापना गरिने छ । बाँकी ३ वटा भवनमा स्टोर र अर्को एउटामा मेडिकल टिम आवश्यकता अनुसार राखिने गरी कार्ययोजना अघि बढाइएको प्रजिअ विमलीले जानकारी दिए । यसका साथै धनकुटा प्रवेश गर्ने मुख्य नाका भेडेटारमा स्वास्थ्य परीक्षण डेक्स स्थापना गरिएको छ । क्वारेन्टाईन कक्षमा तत्कालको लागि ६ वडा वेड तयारी अवस्थामा राखिएका छन् भने आइसोलेसनको लागि पनि बेडहरुको तयारी गरिएको छ ।
अहिले कोरोना भाइरसको कुनै विरामी नदेखिएता पनि कुनै पनि समय संक्रमण हुन सक्ने सम्भावनालाई ध्यानमा राखेर यस्तो व्यवथा गरिएको जनाएको छ । कोरोना भाईरसबाट हुने समस्याका वारेमा सचेतनाका लागि सरकारी तथा सामाजिक संघ संस्थाहरुको समन्वयमा व्यापक प्रचार प्रसार गरिने छ । यस्तो संकटको समयमा हुनसक्ने कालावजारी तथा बजारमा दैनिक उपभोग्य सामग्रीहरुलगायत औषधिको अभाव हुन नदिन कडाईका साथ अनुगमन गरिने प्रजिअ विमलीले जानकारी दिए ।
यस्तै नोवेल कोरोना भाईरसबाट बच्नका लागी हाटबजार बन्द गर्ने निर्णय गरिसकेको छ । तथापी कुनैपनि समय हुनसक्ने संक्रमणलाई ध्यानमा राखेर सरकारको निर्देशन र स्थानीय प्रशासनको पहलमा नेपाली सेनाले नेपाल प्रहरी र सशस्त्र प्रहरी बलसँग आवश्यक समन्वय गरेर पूर्व तयारीको काम गरिरहेको बरख गण सल्लेरीका गणपति भगवान थापा मगरले बताए । गणपति मगरका अनुसार औद्योगिक ग्रामको खाली भवन सफा गर्नुको साथै आवश्यक पर्ने सम्पूर्ण तयारी भैसकेको जानकारी दिए । अहिले औद्योगिक ग्रामको भवन आसपासको सरसफाईदेखि आवश्यक पर्ने बेड, खानेपानी, विद्युत, शौचालयको साथै सडक मर्मतसम्भार गरिएको छ ।
विरामी आएको अवस्थामा आवश्यकताअनुसार चिकित्सकको व्यवस्थासमेत गरिने प्रजिअ विमलीले जानकारी दिए ।
नेपालमा अहिलेसम्म कुनै कोरोनाको विरामी नदेखिएको भनिरहदाँ आजै वीरगञ्जमा एक जना व्यापारी शिवकुमार रुङ्टालाई कोरोना भाईरस पोजिटिक देखिएको छ । हिजोसम्म कुनै विरामी नदेखिएको भनेर लापर्वाही गरिएपनि अब थप सजग हुनुपर्ने अवस्था आएको छ । यो समयमा अत्यावश्यक वस्तुहरुको अभाव हुन नदिन व्यवसायीहरु इमान्दारिताका साथ आफ्नो जिम्मेवारी निर्वाह गर्ने धनकुटा उद्योग वाणिज्य संघका अध्यक्ष विजयसन्तोषी राईले बताए ।