धनकुटा चैत्र ११ । जिल्ला प्रशासन कार्यालयले जारी गरेको निषेधाज्ञामा धनकुटा सुनसान देखिएको छ । विश्वभर फैलिएको कोभिड १९ नोवेल कोरोना भाईरसको संक्रमणबाट जिल्लावासीलाई बचाउन प्रशासनले निषेधाज्ञा जारी गरिएको थियो । निषेधाज्ञालाई जिल्लावासीले पूर्ण रुपमा समर्थन गर्दै घर मै बसेर साथ दिएका छन् ।
बजारमा फाट्टफुट्ट अति काम परेकाहरुमात्र निस्किएका देखिन्थे । तर, ग्रामीण क्षेत्रमा भने बजार जस्तो असर नपरेको स्थानीयवासी बताउँछन् । विशेषगरी गाईवस्तु पालेकाहरु र खेतीपाती गर्नेहरु आफ्नो काम सुचारु राखेका देखिन्थे ।
आज मंगलबार बिहान ६ बजेदेखि लागू हुनेगरी हिजो जिल्ला प्रशासन कार्यालयले निषेधाज्ञा गरिएको सूचना जारी गरेको थियो । नेपाल सरकारले संक्रमण रोग ऐन २०२० को दफा २ अनुसार देशभर लकडाउन जारी गरेको छ । यसलाई सफल बनाउन धनकुटामा स्थानीय प्रशासन ऐन २०२८ को दफा ६ (३) बमोजिम प्रमुख जिल्ला अधिकारीले निषेधाज्ञा जारी गरेको जनाएको छ ।
प्रजिअ विमलीका अनुसार निषेधाज्ञा लागू भएको समयमा यो निर्देशनलाई अटेर गरी अवज्ञा गर्नेलाई कानून बमोजिम कार्वाहीसमेत गरिने जानकारी दिए । उनले कानूनअनुसार निषेधाज्ञा उल्लंघन गर्ने व्यक्तिलाई गिरफ्तार गरी एक हजार रुपैयाँसम्म जरिवाना र एक महिनासम्म कैद गरिने जानकारी दिए ।
प्रजिअ विमलीका अनुसार यो निषेधाज्ञा जनतालाइृ दुःख दिने नियतले नभई आम नागरिकहरुको स्वास्थ्य र महामारी नहोस् भनेर जारी गरिएकोले आमनागरिहरुले साथ र सहयोग गर्ने विश्वास लिएको बताए ।