धनकुटा चैत्र १७ । धनकुटा, चैत्र १७ । विश्वभर महामारीको रुप लिईरहेको नावेल कोरोना भाईरसको संक्रमण नेपालमा नफैलियोस् भनेर नेपाल सरकारबाट चैत्र ११ गतेदेखि लकडाउन गरेको छ । यो समयमा बनिबुतो गरेर पेट भर्ने मजदुर र उनका परिवारहरु भोकै रहेको जानकारी पाएपछि धनकुटा नगरपालिका वडा नं. ३ का वडाध्यक्ष विकास घिमिरेले व्यक्तिगत पहलमा खाद्यान्न वितरण गरेका छन् ।
वडाध्यक्ष घिमिरेले पहिलो चरणमा वडाका ३५ विपन्न परिवारलाई राहत सामग्रीका साथै मास्क वितरण गरेका छन् । घिमिरेले प्रति परिवार आधा बोरा चामाल, एक किलो दाल, एक किलो नुन वितरण गरेका छन् । उनले आगामी दिनमा वडाका अन्य विपन्न परिवारको खोजी गरी अतिआवश्यक राहत सामग्री वितरण गर्ने जानकारी दिए ।
वडाध्यक्ष घिमिरेले सरकारले लकडाउन घोषणा गर्दै कोहि कसैलाई विशेष कामबाहेकको अवस्थामा बाहिर निस्कन प्रतिवन्द लगाएको छ । यस्तो अवस्थामा हुनेखानेले अतिआवश्यक सामान सञ्चय गरेर राखे पनि विपन्न वर्गहरुले यस्तो गर्न सक्ने अवस्था नरहने उनले बताए । उनले वडा नं ३ का बनिबुतो गरेर खाने विपन्न मजदुरहरु भोकभोकै बस्न नपरोस् भनेर आफुले खाद्यान्न वितरण गरेको बताए । राहत सामग्री वितरण गर्दै वडाध्यक्ष घिमिरेले उनीहरुलाई विश्वमै महामारीका रुप लिदै गरेको कोरोना भाईरसका वारेमा जानकारी गराउँदै यसबाट आफु बच्न र समाजलाई बचाउन मास्क लगाउन र साबुन पानीले हात हुन आग्रहसमेत गरे ।
