धनकुटा । धनकुटा नगरपालिकाले नोवेल कोरोना भाइरस (कोभिड १९ ) को संक्रमण नफैलियोस् भनेर नगरको मुख्यमुख्य वजार क्षेत्रहरुमा किटनाशक औषधि सोडियम हाईड्रो क्लोरिन छर्कन थालेको छ । पछिल्लो समय नेपालमा पनि कोरोना भाईरसको संक्रमण भएका रोगीहरु देखिएसँगै सो किटनाशक औषधि छर्किएको नगरप्रमुख चिन्तन तामाङले जानकारी दिए ।
प्रति लिटर पानीमा १६ ग्रामका दरले क्लोरिन घोलेर किटनाशक औषधि बनाईन्छ । सो औषघिलाई दमकलको सहायताले छर्किन्छ । पहिलो चरणमा बसपार्कलगायत धनकुटा बजार तथा हिले बजारमा छर्केको छ । यसरी नै क्रमशः मूलघाटलगायतका क्षेत्रमा छर्कदै जाने प्रमुख प्रशासकीय अधिकारी रामबहादुर थापाले जानकारी दिए ।
सरकारले कोरोना भाईरसको महामारी नेपालमा नफैलियोस् भनेर लकडाउन गरिसकेको छ । अहिले विदेशबाट आएका नगरवासीहरुको लगत राखिने काम भईसकेको नगर प्रमुख तामाङले जानकारी दिए । नगरपालिकामा कोहि विरामी शंकास्पद देखिए तत्काल आईसोलेशनमा राखेर उपचार गर्ने व्यवस्था मिलाईएको छ ।
नगरपालिका क्षेत्रमा यदि त्यस्तो विरामी देखिए क्वारेन्टाईनका लागि औद्योगिक ग्राममा क्वारेन्टाईन बनाईएको छ ।