धनकुटा । धनकुटा उद्योग वाणिज्य संघले कोरोना भाईरसको जोखिममा फ्रन्टलाईनमा काम गर्ने सञ्चारकर्मी, ट्राफिक प्रहरी तथा एम्वुलेन्स चालकहरुलाई मास्क, सेनिटाईजर, ह्याण्डवास तथा साबुन वितरण गरेका छन् । संघले नोवेल कोरोना भाईरसको संक्रमणबाट विश्व त्रसित भईरहेको अवस्थामा धनकुटाको अवस्थाका वारेमा सुसूचित गराउने सञ्चारकर्मीलाई पत्रकार महासंघको सभाहलमा एक कार्यक्रमको आयोजना गरी सो सामग्री वितरण गरेका हुन् ।
संघद्वारा जिल्लामा क्रियाशील नेपाल पत्रकार महासंघ शाखामा आवद्ध सञ्चारकर्मीहरुलाई माक्स र सेनिटाईजर वितरण गरेका हुन् । संघका अध्यक्ष विजयसन्तोषी राईले पत्रकार महासंघका कार्यवाहक अध्यक्ष नगेन्द्र राईलाई सो सामग्री हस्तान्तरण गरेर वितरण शुरु गरेका थिए । सो सामग्रीहरु संघका अध्यक्ष राई, वरिष्ठ उपाध्यक्ष मनकुमारी तितुङ (तारा), महासचिव रामबहादुर गोङ्वा, सचिव राम राया, कोषाध्यक्ष रुपेश श्रेष्ठ, सदस्यहरु रेजिना पालिखे, लिजा श्रेष्ठ, रेवती प्रसाद अधिकारी, उज्ज्वल कर्माचार्य र संघका कार्यालय प्रमुख सिजन प्रधानले वितरण गरेका हुन् ।
सो अवसरमा संघका अध्यक्ष राईले अहिलेको जोखिमयुक्त समयमा पनि विभिन्न स्थानमा गएर फ्रन्टलाईनमै भएर स्थलगत रिपोर्टिङ गर्नुपर्ने सञ्चारकर्मीहरु पनि सुरक्षित हुनुपर्ने भएकाले सुरक्षा सामग्री वितरण गरिएको जानकारी दिए ।
सामग्री बुझ्दै महासंघका कावा अध्यक्ष नगेन्द्र राईले जिल्लाका क्रियाशील सञ्चारकर्मीहरुले जोखिम मोलेर सत्यतथ्य समाचार प्रशारण गरिरहनु पर्ने अवस्थामा वाणिज्य संघले सुरक्षा सामग्री उपलब्ध गराएकोमा संघलाई धन्यवाद दिए ।
सामग्री वितरण कार्यक्रममा प्रदेश पत्रकार महासंघका सदस्य सन्तोष रुचाल, महासंघ जिल्ला उपाध्यक्ष नगेन्द्र राई, सचिव विदुर खवास, सहसचिव हरिबहादुर लम्जेल, फोनिजका अध्यक्ष सन्तवीर लामालगायत पत्रकारहरुकोे उपस्थिति रहेको थियो ।
कार्यक्रमको संचालन संघका महासचिव रामबहादुर गोङ्वाले गरेका थिए । वितरित केहि सामग्रीहरु धनकुटा इन्स्टिच्यूट अफ हेल्थ साईन्सका प्रवन्ध निर्देशक रामनारायण प्रसाद रामाले पनि उपलब्ध गराएको संघका अध्यक्ष राईले जानकारी दिए ।
त्यस्तै सोमवार नै धनकुटा जिल्ला अस्पतालमा कार्यरत स्वास्थ्यकर्मी, एम्वुलेन्स चालक र धनकुटामा डिउटीमा खटिएका ट्राफिक प्रहरी, सुरक्षाकर्मीहरुलाई पनि माक्स, सेनीटाईजर, पन्जा वितरण गरिएको अध्यक्ष राईले बताए ।
संघको पाख्रिवास, आँखिसल्लाको थलथले बजारमा समेत मास्क, सेनिटाईजर र हेण्ड वासलगायतका सामग्रीहरु वितरण गर्ने कार्यक्रम रहेको संघका अध्यक्ष राईले जानारी दिए ।
