धनकुटा, चैत्र २१ । देशमा कोरोना भाईरस नियन्त्रणका लागि नेपाल सरकारले घोषणा गरेको लकडाउनको कारण दैनिक ज्यालादारी गरेर पेट भर्ने मजदुर, असहाय तथा गरिव परिवार भोकभाकै नपरुन् भनेर नगरपालिकाले खाद्यान्न वितरण गरेको छ ।
लकडाउनका कारण दैनिक ज्यालादारी गरेर पेट भर्दै आएका मजदुरलगायत निम्न आय भएका वर्गका परिवारहरुलाई सानो भए पनि राहत पुगोस् भनेर राहत वितरण गरिएको नगरप्रमुख चिन्तन तामाङले जानकारी दिए ।
अहिलेसम्म वितरण गरिएको वडाहरुमा वडा ३ मा २९ जना, वडा ४ मा ५० जना, वडा ६ मा २ सय १७ जना, वडा ७ मा १ सय ६० जना, वडा ९ मा ९२ जना र वडा १० मा १ सय ७ जनालाई राहत वितरण गरिएको प्रमुख प्रशासकीय अधिकृत रामबहादुर थापाले जानकारी दिए ।
नगरपालिकाले प्रतिपरिवार २५ केजी पानमारा चामल, २ केजी दाल, तेल १ लिटर, नून १ केजी र डिटोल साबुन १ वटा वितरण गरेको नगरपालिकाले जनाएको छ । बाँकी वडाहरुमा भोली राहत वितरण गरिने प्रमुख प्रशासकीय अधिकृत थापाले जानकारी दिए ।
हालै धनकुटा नगर कार्यपालिकाको आकस्मिक बैठकले नगरका ज्यालादारी काम गर्ने मजदुर, निम्न आय भएका वर्गलगायतलाई यो लकडाउनको समयमा राहत वितरण गर्ने निर्णय भएबमोजिम राहत वितरण गरिएको छ ।
यसरी राहत वितरण कार्यक्रममा नगर प्रमुख चिन्तन तामाङ, उपप्रमुख सकुन्तला बस्नेत, सम्बन्धित वडाका वडाध्यक्षहरु, प्रमुख प्रशासकीय अधिकृत रामबहादुर थापालगायत नगरपालिकाका कर्मचारीहरु सलंग्न भएका थिए ।
सो अवसरमा नगरप्रमुख तामाङले ती परिवारहरुलाई विश्वमै महामारीको रुप लिदै गरेको कोरोना भाईरसका वारेमा जानकारी दिदै यसबाट बच्न घर बाहिर ननिस्कन र साबुन पानीले राम्ररी हात धुन आग्रहसमेत गरे । सो अवसरमा राहत पाउने विपन्न मजदुरहरुले नगरपालिकाले वितरण गरेको खाद्यान्नको कारण भोकै मरिन्छ कि भन्ने पिर हटेको प्रतिक्रिया दिए ।
नगरपालिकामा जम्मा १ हजार ४ सय ६७ जनालाई राहत वितरण गर्ने तयारी गरेको प्रमुख प्रशासकीय अधिकृत थापाले जानकारी दिए । यसमा केहि संख्या बढ्न सक्ने उनले जानकारी दिए ।