धनकुटा २२ चैत्र । नोवेल कोरोना भाईरसबाट बच्नका लागी मुलघाटस्थित विश्रान्ती बुद्धाश्रममा आश्रित बृद्धबृद्धाहरुलाई आज मास्क, सेनिटाईजर, हेण्डवासलगायतका सुरक्षित सामग्रीहरु वितरण गरिएको छ । सो सामग्री धनकुटा उद्योग बाणिज्य संघले वितरण गरेका हुन् । सो अवसरमा संघका पदाधिकारीहरुले बृद्धबृद्धाहरुलाई कोरोना भाईरसबाट बच्ने उपायका वारेमा परामर्श पनि दिएका थिए ।
सो सामग्रीहरु संघका अध्यक्ष विजयसन्तोषी राई, महिला उपाध्यक्ष निर्मला राई श्रेष्ठ, महासचिव राम बहादुर गोङ्वा, कोषाध्यक्ष रुपेश श्रेष्ठ, कार्यकारी सदस्य लिजा श्रेष्ठ, मनोकामना फार्मेसी एण्ड स्वास्थ्य क्लिनिक मुलघाटका संचालक तथा स्वास्थ्यकर्मी श्रवणकुमार शाहलगायतका टोलीले वितरण गरेका हुन् । सो सामग्री बृद्धाश्रमका ४३ जना बृद्धबृद्धाहरुलाई वितरण गरिएको संघका अध्यक्ष विजयसन्तोषी राईले जानकारी दिए । अध्यक्ष राईले एकै ठाउमा ठूलो समुहमा बुद्धबुद्धाहरु बस्दै आएकाले उनीहरुलाई कोरोना भाईरसबाट बच्नका लागी उक्त स्वास्थ्य सामग्रीहरु वितरण गरिएको जानकारी दिए ।
प्राविधिक तथा स्वास्थ्य सहयोगका साथ केही स्वास्थ्य सामग्रीहरु मनोकामना फार्मेसी एण्ड स्वास्थ्य क्लिनिक मुलघाटका संचालक श्रवणकुमार शाह र धनकुटा इन्स्टिच्यूट अफ हेल्थ साईन्सका प्रवन्ध निर्देशक राम नारायणप्रसाद रामाले उपलब्ध गराएको संघका कोषाध्यक्ष रुपेश श्रेष्ठले जानकारी दिए ।
सो अवसरमा विश्वव्यापी महामारीको रुप लिदै आएको कोराना भाईसरको वारेमा संघका महासचिव रामबहादुर गोङवाले र कोरोना भाईरसबाट बच्ने उपायका वारेमा तथा स्वास्थ्य सम्वन्धि जानकारी मनोकामना फार्मेसी एण्ड स्वास्थ्य क्लिनिक मुलघाटका संचालक श्रवणकुमार शाहले गराएका थिए । यसैगरी कोरोनााट मुक्त हुनबाट बच्न हात धुने तरिकाको वारेमा संघका उपाध्यक्ष निर्मला राई, कोषाध्यक्ष रुपेश श्रेष्ठ र सदस्य लिजा श्रेष्ठले प्रत्यक्ष रुपमा सिकाएका थिए । संघका अध्यक्ष राईको अध्यक्षतमा भएको कार्यक्रमको संचालन महासचिव गोङवाले गरेका थिए ।
नेपाल सरकारले कोरोना नियन्त्रणका लागि लकडाउनको घोषणा गरेपनि धनकुटावासीलाई कोरोना भाईरसको संक्रमणबाट बचाउन उद्योग वाणिज्य संघ आफ्नो ज्यान जोखिम पारेर खटिरहेको भन्दै बृद्धहरुले प्रशंसा गर्दै धन्यवाद दिएका छन् ।
