धनकुटा । सरकारको जारी गरेको लक डाउनका कारण घर जान नपाएका सुस्तमनस्थिति भएका विद्यार्थीहरुलाई धनकुटा उद्योग बाणिज्य संघले सुरक्षा सामग्री वितरण गरेका छन् । विश्वव्यापी महामारीका रुप लिदै गरेको कोरोना भाईरसबाट बच्नका ती सामग्री संघले वितरण गरेका हुन् ।
उत्तरपानीस्थित सुस्त मनस्थिति स्रोत केन्द्र आधारभूत विद्यालयमा अध्ययनरत सुस्तमनस्थिति अवस्थाका विद्यार्थीहरुलाई संघका अध्यक्ष विजयसन्तोषी राई, वरिष्ठ उपाध्यक्ष मनकुमारी तिुतङ (तारा), महासचिव रामबहादुर गोङ्वा, सचिव श्रीराम रायमाझी, सदस्य अम्विका देवी धमला, व्यवसायीहरु धनबहादुर तामाङ, जयन्द्र घिसिङ, नेपाल पत्रकार महासंघका सदस्य कविराज घिमिरेलगायतले ती सामग्री वितरण गरेका थिए ।
सो अवसरमा सुस्त मनस्थिति भएका विद्यार्थीहरुलाई भाईरसको संक्रमण हुन नदिन हात धुने तरिकासमेत सर्काएको थियो । उनीहरुलाई संघको टोलीले मास्क, सेनिटाईजर, हेण्ड वास, साबुनसमेत वितरण गरेका थिए । सो अवसरमा उनीहरुलाई कोरोना भाईरस संक्रमण हुनबाट बच्ने उपायका वारेमा जानकारी गराईएको संघका महासचिव राम वहादुर तामाङले जानकारी दिए ।
लक डाउनका कारण विद्यालय विदा भएपनि घर जान नपाई विद्यालयमा नै बसेका स्रोतकेन्द्रका विद्यार्थीहरु विद्यालयको छात्रवासमा सामुयिक रुपमा बसिरहेका छन् । यस्तो अवस्थामा उनीहरुलाई कोरोना भाईरसको संक्रमणबाट बच्न स्वास्थ्य सम्वन्धि जनचेतना जगाउँदै सुरक्षित सामग्री अति आवश्यक भएकोले ती सामग्रीहरु वितरण गरिएको संघका अध्यक्ष विजय सन्तोषी राईले जानकारी दिए ।
धनकुटामा नोवेल कोरोना भाईरस (कोभिड १९) को संक्रमण फैलन नदिई नियन्त्रण गर्नका लागी संघले सचेतना कार्यक्रम सञ्चालन गरिनुका साथै सुरक्षित सामग्रीहरु वितरण गर्दै आएको संघका वरिष्ठ उपाध्यक्ष मन कुमारी तितुङ (तारा) ले जानकारी दिईन् । उनले यसअघि संघले फ्रन्टलाईनमा बसेर काम गर्ने सञ्चारकर्मी, एम्बुलेन्सका चालक, ट्राफिक प्रहरीहरुलाई यस्ता सुरक्षित सामग्रीहरु वितरण गरिसकेको जानकारी दिईन् ।
