धनकुटा चैत्र २५ । विश्वमा नोवेल कोरोना भाईरस ( कोभिड १९) को संक्रमण फैलिएपछि सरकारले नेपालमा पनि संक्रमण नफैलियोस् भनेर लकडाउन जारी गरेको छ । यो लकडाउनको कारण आयआर्जन गुमाएका निम्न आय भएका नगरवासीहरुलाई धनकुटा नगरपालिकाले राहत वितरण गरेको छ । अहिलेसम्म नगरपालिकाले नगर क्षेत्रभित्रका २ हार २ सय ९३ परिवारलाई राहत वितरण गरेको धनकुटा नगरपालिकाका प्रमुख चिन्तन तामाङले जानकारी दिए । प्रमुख तामाङका अनुसार यी परिवारका जम्मा ११ हजार ४ सय ६५ जनालाई राहत पाएको छन् ।
प्रति परिवार एक हजार सातसयका दरले राहत विरण गरिएको प्रमुख प्रशासकीय अधिकृत रामबहादुर थापाले जानकारी दिए । उनका अनुसार यसका लागि धनकुटा नगरपालिकाद्वारा कुल ३९ लाख ४८ हजार पाँच सय २० रुपैया बरावर खर्च भएको जानकारी दिए ।
यसरी वितरण गरिएको राहत सामग्रीले लकडाउनको कारण दैनिक रोजगार गुमाएका विपन्न परिवरका व्यक्तिहरुलाई जीवनयापन सञ्चालन गर्न सहज भएको मजदुरहरु बताउँछन् । राहत सामग्रीहरु नगरपालिकाका १० वटै वडामा वितरण गरिएको थियो । वडागत रुपमा राहत पाउनेहरुमा वडा १ मा ५ सय, २ मा ९० जना, ३ मा १ सय ६४ जना, ४ मा १ सय २३ जना, ५ मा १ सय ७३ जना, ६ मा ३ सय २८ जना, ७ मा ३ सय ४९ जना, ८ मा १ सय ७५ जना, ९ मा २ सय ४२ जना र १० मा १ सय ४९ गरी जम्मा २ हजार २ सय ९३ जना रहेका छन् ।
यसैगरी नगरपालिकाले नगरभित्रका स्वास्थ्य संस्थाहरुमा कार्यरत स्वास्थ्यकर्मी, एम्बुलेन्स चालक, सरसफाइकर्मी र नगर प्रहरीलाई पीपीई, माक्स, स्यानिटाइजर, साबुनलगायतका स्वास्थ्य सुरक्षा सामग्री उपलब्ध गराईएको उपप्रमुख शकुन्तला बस्नेतले जानकारी दिईन् । सो सामग्री खरिदका लागि नगरपालिकाले पाँच लाख खर्च गरेको प्रमुख प्रशासकीय अधिकृत रामबहादुर थापाले जानकारी दिए । त्यसैगरी धनकुटा नगरपालिका वडा नं. ६ औद्योगिक ग्राममा निर्माण गरिएको क्वारेन्टाइन तथा आईसोलेशन सेन्टर ब्यवस्थापन तथा अन्य आकस्मिक कामको लागि १५ लाख विनियोजन गरी कार्य गरिरहेको थापाले जानकारी दिए ।
यसैगरी आज बसेको नगरपालिकाको बैठकले नगर प्रमुख चिन्तन तामाङको अध्यक्षतामा ४ सदस्यीय धनकुटा नगरपालिकास्तरीय विपत व्यवस्थापन केन्द्र समिति गठन गरेको छ । समितिमा प्रमुख प्रशासकीय अधिकृत रामबहादुर थापा, नगर स्वास्थ्य प्रमुख भोजराज भण्डारी र जिल्ला प्रहरी कार्यालयले तोकेको प्रतिनिधि रहने जनाएको छ । यस्तै नगर प्रमुख तामाङको संयोजकत्वमा ७ सदस्यीय निर्देशक समिति गठन गरेको छ । सो समितिको उपसंयोजकमा उपप्रमुख शकुन्तला बस्नेत रहेकी छिन् । यस्तै सदस्यहरुमा वडा ४ का अध्यक्ष जमशेर राई, वडा ६ का अध्यक्ष नरेश श्रेष्ठ, वडा ९ का अध्यक्ष मनोज रायमाझी, प्रमुख प्रशासकीय अधिकृत थापा, रेडक्रस सोसाईटीका प्रतिनिधि रहने प्रमुख प्रशासकीय अधिकृत थापाले जानकारी दिए । उनका अनुसार नगरपालिकाले यो संक्रमणबाट नगरवासीलाई राहत दिन ५४ लाख ४८ हजार ५ सय २० सम्म खर्च गर्नेगरी वजेट व्यवस्था गरिएको छ
