धनकुटा ३ बैशाख । जिल्लामा कोरोना भाईरसको संक्रमण फैलन नदिन भैरहेको अभियान प्रभावकारी ढंगबाट सञ्चालन भैरहेको छ । सो कुरा प्रतिनिधि सभाका सदस्य राजेन्द्रकुमार राईले धनकुटामा आयोजित प्रदेश सभाका सदस्यहरु, जिल्ला समन्वय समितिका प्रमुख, स्थानीय तहका प्रमुखहरुसहितको सहभागितामा भएको पत्रकार सम्मेलनमा सांसद राईले बताएका हुन् ।
सांसद राईले जिल्लाका सबै स्थानीय तहहरुले आ – आफ्नो तहमा विश्वलाई आतंकित पार्दै आएको कोरोना भाईरसको संक्रमण जिल्लावासीमा हुन नदिन अहिलेसम्म सञ्चालन गरिरहेको अभियान प्रभावकारी भएपनि अझै यसको त्रास रहिरहेकाले यसलाई नियमितता दिनुपर्ने बताए । उनले यस्तो समयमा आमनागरिक घरमै लकडाउनमा बसिरहेकोले निम्न आय भएका समुदायहरुलाई सरल तरिकाले राहत उपलब्ध गराउन सुझाव दिए ।
सांसद राईले कोरोना भाईरस फैलन नदिन सबै नागरिकहरुले सरकारले घोषणा गरेको लकडाउनलाई सफल बनाउन आग्रह गरे । उनले कोरोना भाईरस धनकुटामा फैलन नदिन र नियन्त्रणका लागि सञ्चालन गरिरहेको विभिन्न अभियानहरुलाई आफ्नोतर्फबाट सक्दो सहयोग रहने बताए ।
सो अवसरमा १ नं. प्रदेशका न्याय, कानून तथा विधायन समितिका सभापति इन्द्रमणी पराजुली, प्रदेश सांसद निरन राई, जिल्ला समन्वय समितिका प्रमुख टंक चुवान, धनकुटा नगरपालिकाका प्रमुख चिन्तन तामाङ, पाख्रिवास नपाका प्रमुख बृष बहादुर राई, महालक्ष्मी नपाका उपप्रमुख मञ्जु अधिकारी, शहीदभूमी गाउँपालिकाका अध्यक्ष मनोज राई, छथरजोरपाटी गापाका अध्यक्ष शेरबहादुर लिम्बु, साँगुरीगढी गापाका अध्यक्ष कुमारजंग याक्खा, चौविसे गापाका प्रमख खजिन्द्र राईलगायतले कोरोना भाईरस फैलिन नदिन गरिरहेको अभियानको वारेमा समेत जानकारी दिएका थिए ।
प्रतिनिधि सभाका सदस्य तथा नेकपा धनकुटाका अध्यक्ष राजेन्द्र राईको अध्यक्षतमा सम्पन्न पत्रकार सम्मेलनको सञ्चालन अर्जुन राईले गरेका थिए ।
यसैगरी सांसद राजेन्द्र राईले कोरोना भाईरसको संक्रमण फैलिन नदिने सम्बन्ध अपनाउनु पर्ने सतकर्ता र सुरक्षाका विषयमा प्रमुख जिल्ला अधिकारी तथा सुरक्षा निकायका प्रमुखहरुसँग छलफल गरेका छन् ।