धनकुटा । कोरोना भाईरसलाई फैलिन नदिन सरकारले लगाएको लकडाउनमा बाहिर गएर तरकारी किन्न हुने समस्यालाई मध्यनजर घरघरमा तरकारी किन्ने व्यवस्था गरेको छ । सो व्यवस्था धनकुटा उद्योग वाणिज्य संघको समन्वयमा गरिएको छ ।
उपभोक्ताहरुलाई आवश्यक पर्ने ताजा तरकारी, ग्यास, दूधलगायतका अत्यावश्यक वस्तु घरघरमै सुपथ मूल्यमा विक्री वितरण गर्न शुरु गरिएको छ । वाणिज्य संघले स्थानीय प्रशासन र सुरक्षाकर्मीहरुको सहयोगमा धनकुटा बजार र हिलेवजारको मुख्य मुख्य चोकहरुमा बिक्रीतिरणको व्यवस्था गरेको हो । गाडिबाट ढुवानी गरिएको भएपनि साग प्रति मुठा पाँच रुपैया, हरियो मोटर कोसा २० रुपैया केजीमा विक्री वितरण गरिएको संघका कार्यकारी सदस्य रेजिना पालिखेले जानकारी दिईन् ।
संघका अध्यक्ष विजयसन्तोषी राई, वरिष्ठ उपाध्यक्ष मन कुमारी तितुङ्ग, कोषाध्यक्ष रुपेश श्रेष्ठ, कार्यकारी सदस्यहरु रेजिना पलिख, अम्विका देवी धमला, नगेन्द्र काफ्ले, उज्ज्वल कर्माचार्य, संघका कार्यालय प्रमुख सिचन प्रधानलगायतले प्रत्यक्ष रुपमा सहभागी भएर अनुगमन तथा सहजीकरण गरिरहेको छन् । विपन्न वर्गका व्यक्तिहरुलाई निःशुल्क रुपमा पनि उपलब्ध गराईएको अर्का सदस्य नगेन्द्र काफ्ले जानकारी दिए ।
यस्तो व्यवस्थाले एकातिर उपभोक्ताहरुले सुपथ मूल्यमा घरछेउमै हरियो तथा ताजा तरकारी पाउने छन् भने अर्कोतिर किसानहरुले पनि बिक्री नभएर फाल्नु पर्ने आउन सक्ने अवस्थालाई ध्यानमा राखेर यो व्यवस्था गरिएको संघका अध्यक्ष विजयसन्तोषी राईले बताए ।
यो व्यवस्थाले सहज भएको उपभोक्ता विजयशेखर श्रेष्ठले बताए । उनले यसरी सुपथ मूल्यमा घर छेउमा तरकारी उपलब्ध गराएकोमा संघलाई धन्यवाद दिदै खरिद गर्दा दुरी कायम राख्न सचेत हुनुपर्ने बताए ।
