धनकुटा बैशाख ५ । अमेरिकाको न्यूयोर्कमा बसोवास गर्दै आएका एक जना धनकुटेलीको नोवेल कोरोना भाईरसको संक्रमणबाट निधन भएको छ । धनकुटा नगरपालिका वडा नं. ५ माथिल्लोकोप्चे निवासी महेश अमात्यको हिजो राती ८ वजे निधन भएको हो ।
केहि दिनदेखि ज्वरो आएको तर औषधि खाएपछि निको भएको थियो । हिजो अचानक धेरै ज्वरो आएपछि न्यूयोर्कस्थित अस्पतालमा जचाउन गएका थिए । उनको उपचारको क्रममा अमेरिकी समय विहान ५ वजे नेपाली समय विहीवार राती ८ वजे चिकित्सकले मृत घोषणा गरेका थिए । ६९ वर्षिय अमात्य केहि वर्षदेखि श्रमिती शारदालक्ष्मीसँगै अमेरिकाको न्यूयोर्कममा बस्दै आएका थिए । न्यूयोर्क अहिले विश्वमै धेरै संक्रमित भएको शहरपनि हो ।
२००७ साल बैशाख १९ गते जन्मिएका स्व. अमात्य चार छोरा र दुई छोरीहरुमा जेठा सुपुत्र थिए । उनका तीन छोराहरु छन् । जेठा र माईला छोरा हाल ललितपुर एकान्तकुनामा बस्छन् भने कान्छा छोरा अमेरिकामै बसोवास गर्दै आएका छन् ।
चैत्र पहिलो हप्ता नेपाल आउने अमात्य दम्पति टिकट समेत लिएका थिए । तर चीनबाट नोवेल कोरोना भाईरस फैलिएसँगै नेपाल आउने कार्यक्रम स्थगित गरेका थिए ।
स्व. अमात्यले लामो समय सरकारी सेवा गरेका थिए । स्व. अमात्य धनकुटाका नव कलाकार सांस्कृतिक समूहमा आवद्ध कलाकार पनि थिए । उनी अशेष मल्लको लेखन तथा निर्देशनमा प्रदर्शित तुवालोले ढाकेका वस्तीका एक प्रमुख कलाकार थिए । उनको दाहसंस्कार आउँदो विहीवारमात्र गर्ने उनका छोरा दिपेश अमात्यले जानकारी दिए ।
