धनकुटा १० बैसाख । धनकुटा उद्योग बाणिज्य संघले बजार अनुगमन गर्दै स्वास्थ्य तथा सुरक्षित सामग्रीहरु वितरण गरेको छ । आज संघले शहीदभूमी गाउँपालिकाको थलथले बजार र पिप्ले बजारमा अनुगमन गरेको छ । लकडाउनको समयमा आपूर्ति व्यवस्था सहज बनाई उपभोक्ताहरुलाई सहज तथा सुलभ मूल्यमा दैनिक उपभोग्य वस्तु उपलब्ध गराउन अनुगमन गरिएको जनाएको छ । सोहि अवरमा संघले यी स्थानमा बजार अनुगमन गर्दै व्यापारी र उपभोक्ताहरुलाई स्वास्थ्य तथा सुरक्षित सामग्रीहरु वितरण गरेको हो ।
सो अनुगमनको क्रममा संघले व्यवसायीहरुलाई पसलमा देख्नेगरी मूल्यसूची अनिवार्य रुपमा राख्न सचेत गराएका थिए । यस्तै व्यवसायीहरुलाई ग्राहकहरुसँग सामाजिक दुरी कायम गर्न, म्याद समाप्त भएको र अखाद्य वस्तुहरु विक्रीवितरण नगर्न सचेत गराईएका थिए । सो अवसरमा संघका अध्यक्ष विजयसन्तोषी राई, महासचिव रामबहादुर गोङ्वा, सचिव श्रीराम रायमाझी, कोषाध्यक्ष रुपेश श्रेष्ठले बजार अनुगमन गर्दै कोराना भाइरसबाट बच्नका लागी मास्क, सेनिटाईजर, पञ्जा वितरण गरेका थिए ।
सो अवसरमा कान्तिपुर मिडिया ग्रुपका उपसम्पादक बिनोद घिमिरे, सुरक्षाकर्र्मी, पत्रकारलगायतको सहभागीता रहेको थियो ।
यस्तै थलथले बजारको अनुगमन गर्दै सहिदभूमी गाउँपालिका ६ वडा कार्यालयलाई हात धुने हेण्डवास, मास्क, सेनिटाईजर, पञ्जा वडाध्यक्ष हेमकुमार राईलाई हस्तान्तरण गरिएको संघका महासचिव रामबहादुर गोङ्वाले जानकार दिए ।
यस्तै यो क्षेत्रमा दैनिक उपभोग्य सामग्रीहरुको आपूर्ति र स्थानीय उत्पादित तरकारी तथा फलफुल निर्यातको अवस्थाका वारेमा जानकारी लिएका थिए । कोरोना भाईरस फैलन नदिनका लागी संघका पदाधिकारीहरुले पालिकाका पदाधिकारीहरुसँग छलफलसमेत गरेका थिए । सो अवसरमा सहिदभूमीमा स्थापना गरिएको क्वारेन्टाईनको अवलोकन समेत गरी जानकारी लिएका थिए ।
संघले सहिदभूमी गाउँपालिकाका अध्यक्ष मनोज राई, प्रमुख प्रशासकीय अधिकृत राजकुमार शाक्य, इलाका प्रहरी कार्यालय छिन्ताङ्गका प्रहरी निरीक्षक नारायणप्रसाद गौतम, वडा ४ का वडाध्यक्ष भुपेन्द्र राई, वडा ६ का वडाध्यक्ष हेमकुमार राई लगायतसँग छलफल गरेका थिए । उनीहरुले पालिकाको उपभोग्य सामग्रीहरुको आयात तथा स्थानीय उत्पादित तरकारी निर्यातका विषयमा छलफल गरेका थिए ।
सो अवसरमा अध्यक्ष मनोज राईले अत्यावश्यक वस्तु सहज रुपमा उपलब्ध भैरहेको जानकारी दिए । संघका अध्यक्ष विजय सन्तोषी राईले जिल्लाका सबै स्थानीय तहहरुमा सहज रुपमा अत्यावश्यक वस्तु उपलब्ध गराउन उद्योग वाणिज्य संघ क्रियाशील रहेको जानकारी दिए । उनले स्थानीय उत्पादन निर्यात गर्न पनि संघले सहजीकरण गरिरहेको जानकारी दिए ।
वाणिज्य संघको टोली र पालिकाका अध्यक्ष मनोज राई सहितको टोलीले थलथले बजारमा स्थापना गरिएका १६ बेडको क्वारेन्टाईन कक्षको अवलोकन गरेका थिए । सो अवसरमा अध्यक्ष राईले संघका पदाधिकारीहरुलाई क्वारेन्टाईन अवस्थाका वारेमा जानकारी दिएका थिए । सो अवसरमा संघले गाउँपालिका कार्यालय र इलाका प्रहरी चौकी छिन्ताङ्गका लागी हेण्ड वास, सेनिटाईजर, मास्कलगायतका स्वास्थ्य सामग्रीहरु हस्तान्तरण गरेका थिए ।