धनकुटा । धनकुटा उद्योग बाणिज्य संघका अध्यक्ष, उपाध्यक्षसहित धनकुटा र हिलेबजारका दर्जन बढी घरधनीहरुले घरभाडा मिनाहा गरिदिएका छन् । घरधनीहरुले कोराना भाईरसलाई नियन्त्रण गर्न सरकारले लगाएको लकडाउनको कारण व्यापार, व्यवसाय बन्द भई व्यवसायीहरुलाई ठूलो आर्थिक मार परेपछि धनकुटा उद्योग वाणिज्य संघले घरभाडा मिनाहाका लागि आग्रह गरेका थिए ।
धनकुटा नगरपालिका वडा नं. ५ धरहरा चौकको घरमा व्यवसाय संचालन गरेको किराना पसल र खाजा घरको भाडा बाणिज्य संघका अध्यक्ष विजयसन्तोषी राई र सुखकला राईले मिनाहा गरेका छन् । यसैगरी संघका उपाध्यक्ष खगेन्द्र विष्टले हिले बजारको घरमा रहेको न्यू जेनिस टेर्लसलाई लकडाउन अवधिभरको घर भाडा मिनाहा गरिदिने जनाएको छ ।
यसैगरी हिलेकै थामबहादुर लिम्बु र हेमकुमारी लिम्बुले तीन वटा घरमा व्यवसाय संचालन गरेको डाँफे मुनाल ग्रिल उद्योग, साथीभाई अफसेट प्रेस, खाजाघरलगायत चार जना व्यवासायीहरुलाई लकडाउन अवधिभरको घर भाडा पुरै मिनाहा गरिदिने भएको बाणिज्य संघका सदस्य तथा यूवा व्यावसायी गणेश थापाले जानकारी दिए ।
हाल यू केमा बस्दै आएका थामबहादुर लिम्बु र हेमकुमारी लिम्बुले २०६२÷२०६३ सालको जनआन्दोलनको समयमा पसल बन्द हुदा पुरै घरभाडा छुट दिएको धनकुटा उद्योग बाणिज्य संघले जनाएको छ ।
यस अघिनै धनकुटा नगरपालिका ६ का पूर्ण कृष्ण श्रेष्ठले र हिलेका जंग क्षेत्री, हिलेकै निरवहादुर गोम्देनलगायत एक दर्जन बढी घरधनीहरुले घरभाडा छुट गरिदिएको छ ।
लकडाउनका कारण व्यापार व्यवसाय पूर्ण रुपमा बन्द हुदाँ व्यवसायीहरु अहिले ठूलो संकटमा परेकोले घरधनीहरुले घरभाडा मिनाहा गरी दुःखको समयमा सहयोग गरी दिएकोमा बाणिज्य संघका अध्यक्ष विजयसन्तोषी राई सवै घरधनीहरुलाई धन्यवाद दिदै जिल्लाका सवै बजार क्षेत्रका घरधनीहरुलाई व्यवसायीहरुलाई लकडाउन अवधिभरको घरभाडा छुट गरिदिन हुन समेत आग्रह गरेका छन् ।
बाणिज्य संघले कोरोना भाईरसलाई नियन्त्रण गर्न सरकारले लगाएको लकडाउनका कारण व्यापार व्यवसाय बन्द भएका कारण व्यवसायीहरुलाई ठूलो आर्थिक समस्या भएकाले घरधनी महानुभावहरुलाई घर मिनाहा गरीदिन र बैकको ऋणको व्याज छुट गरी दिन बैंकलगायत सवै वित्तीय संस्थाहरुलाई लकडाउन शुरु भएपछि नै आग्रह गरेको थियो ।
