मदन घिमिरे
काठमाडौं । सूर्यबहादुर थापा प्रतिष्ठानद्वारा काठमाडौंमा अलपत्र परेका धनकुटेलीहरुको लागि वितरण गर्नेगरी राहत सामग्री हस्तान्तरण गरिएको छ । सो सामग्री प्रतिष्ठानका अध्यक्ष तथा पूर्वमन्त्री सुनिलबहादुर थापाले धनकुटा काठमाडौं सम्पर्क समाजका अध्यक्ष प्रेमबहादुर बस्नेतलाई हस्तान्तरण गरेका हुन् ।
सो सामग्री धनकुटा स्थायी घर भई हाल काठामाडौं उपत्यकाका दैनिक मजदुरी गरेर बस्ने, विद्यार्थी, विपन्न, असहाय, एकल महिला, बृद्धबृद्धातथा अपाङ्गता भएकाहरुलाई प्राथमिकता राखेर वितरण गर्न प्रतिष्ठानका अध्यक्ष थापाले सुझाव दिएका छन् । प्रतिष्ठानका अध्यक्ष थापाले नोवेल कोरोना भाईरसको कारण विश्वनै लकडाउनको अवस्थामा छ । उनले यस्तो असहज परिस्थितिमा आफ्नो जन्मथलो छाडेर काठमाडौंमा हातमुख जोड्न सानातिना काम गर्दै आएका जिल्लावासीहरु अहिले रोजगारबाट बञ्चित भएका छन्, यस्तो समयमा केहि राहत पुगोस् र कोहि भोकै नरहुन भन्ने अभिप्रायले यि राहतका सामग्री वितरणका लागि हस्तान्तरण गरेको बताए । यि सामग्रीहरु राजनीतिक आस्थाका आधारमा नभई अतिआवश्यकता भएका व्यक्तिहरुलाई वितरण गर्न आग्रहसमेत गरेका छन् ।
सो अवसरमा राहत सामग्री बुझ्दै समाजका अध्यक्ष बस्नेतले उपत्यकामा रहेका विपन्न र अभावमा दैनिकी गुजारिरहेका धनकुटेलीहरुलाई निवासमै पुगेर वितरण गरिने जानकारी दिए ।
समाजलाई प्रतिष्ठानले २५ केजीको चामल ५० बोरा, दाल, चना, नून, सय केजीका दरले, तोरीको तेल सय लिटर र सोयाविन २५ केजी उपलब्ध गराएको समाजको अध्यक्ष बस्नेतले जानकारी दिए । यि सामग्रीहरु प्रतिष्ठानलाई निम्वस इन्टरनेशनल कम्पनी लि., केएल, दुगड ग्रुप, र साल्ट ट्रेडिङ कर्पोरेशनले सहयोग स्वरुप उपलब्ध गराईदिएको प्रतिष्ठानका अध्यक्ष थापाले जानकारी दिए । अध्यक्ष थापाले राहत सामग्री उपलब्ध गराई दिएकोमा सहयोगी व्यवसायी प्रतिष्ठानहरुलाई प्रेस विज्ञप्ती प्रकाशित गर्दै धन्यवाद समेत दिएको छ ।