धनकुटा । धनकुटा उद्योग बाणिज्य संघ र वितरक संघले नोवेल कोरोना भाईरस संक्रमण पछि सरकारले लगाएको लकडाउनबाट उत्पन्न विविध समस्याहरुका वारेमा स्थानीय सरकारसँग छलफल गरेका छन् । सो अवसरमा संघले नगरपालिकाले लिने विभिन्न करहरु छुट दिने सम्बन्धमा आगह गरेका छन् । यस्तै बजार बन्द भएकाले व्यवसायीहरुको सटर भाडा तथा अन्य सर्वसाारणको घर भाडा मिनाहा एवम दैनिक उपभोग्य तथा अत्यावश्यक सामग्रीहरु ढुवानीका विषयमा पनि छलफल गरेको संघका अध्यक्ष विजयसन्तोषी राईले जानकारी दिए ।
सो अवसरमा लकडाउनको अवधिभरको व्यवसाय कर र नगरपालिकाको व्यावसायिक भवनहरुमा व्यापार व्यवसाय संचालन गरिरहेका व्यवसायीहरुलाई घरभाडा मिनाहा गरिदिन अनुरोध गरेका थिए । सो अवसरमा नगर प्रमुख चिन्तन तामाङले व्यवसायीहरुलाई पर्न गएको पिरमर्कालाई सरोकारवालाहरुसँग छलफल गरेर उचित सम्वोधन गर्ने आश्वासन दिए । उनले यो संकटको समयमा वाणिज्य संघले जनचेतना फैलाउन र सुरक्षित सामग्री वितरण जस्ता गरिरहेको कार्यको प्रशंसा गर्दै नगरपालिकामा दैनिक उपभोग्य वस्तुहरु अभाव हुन नदिनका लागी सरोकारवालाहरुसँग समन्वय र सहकार्य गर्दै आएको जानकारी दिए । उनले यो संकटको समयमा आमनगरवासीलाई सहज रुपमा अत्यावश्यक वस्तु उपलब्ध गराई दिन वाणिज्य संघलाई आग्रह गरे ।
यस्तै उपप्रमुख सकुन्तला वस्नेतले संकटमा परेका जोकोहीलाई नगरपालिकाले सहयोग गर्ने बताईन । उनले लकडाउनलाई सवैले सरकारले दिएको निर्देशनलाई पालना गरी सहयोग गर्नु पर्ने बताईन ।
सो अवसरमा वाणिज्य संघका अध्यक्ष विजयसन्तोषी राई, निर्वतमान अध्यक्ष उमेश घिमिरे, उपाध्यक्ष कृष्णराज श्रेष्ठ, सदस्य डिजेश शाक्य, वितरक संघका कोषाध्यक्ष बिक्रम प्रधान, सदस्य बिपीन थापालगायतका व्यवसायीहरुले सवैको सहयोगबाट मात्र कोरोना भाईरस विरुद्धको लडाईमा सफल हुने बताए ।