धनकुटा । लकडाउनको कारण सबै व्यवसायसँगै पत्रकारिता पेशा पनि संकटमा पर्दै गएको छ । सो कुरा राष्ट्रिय पत्रकारिता दिवसको अवसरमा धनकुटामा आयोजित एक कार्यक्रममा बताएका हुन् ।
सो अवसरमा नेपाल पत्रकार महासंघ १ नम्वर प्रदेश कार्य समितिका अध्यक्ष विक्रम लुईटेलले श्रमजीवी पत्रकार र संचार संस्थाहरु अहिले आर्थिक संकटमा पर्दै गएकाले राज्यले सहयोग गर्नु पर्ने बताए । उनले अहिले प्रदेश सरकारको सहयोगमा प्रदेश कार्यसमितिले प्रकाशन तथा प्रशारण संचारगृहहरुलाई सहयोग गरिरहेको जानकारी दिए ।
यस्तै प्रदेश महासचिव विवेक गौतमले जोखिम तथा संकटमा परेका पत्रकारहरुलाई प्रदेश कार्यसमितिले आगामी दिनमा पनि सहयोग गर्ने आश्वासन दिए ।
नेपाल पत्रकार महासंघ धनकुटाका उपाध्यक्ष नगेन्द्र राईको अध्यक्षतामा सम्पन्न भएको कार्यक्रममा महासंघका पूर्व केन्द्रिय उपाध्यक्ष सञ्जय सन्तोषी राई, पूर्व जिल्ला अध्यक्ष तथा नेपाल प्रेस युनियनका केन्द्रिय उपाध्यक्ष विजयसन्तोषी राई, पूर्व जिल्ला अध्यक्ष खगेन्द्र घिमिरेलगायतले लकडाउनका कारण सञ्चार क्षेत्रमा आर्थिक संकट बढ्दै गएकाले अहिले पत्रकारिता पेशानै संकटमा पर्दै गएकोले सरोकारवाला निकायहरुले सहयोग गर्नु पर्नेमा जोड दिएका थिए । उनीहरुले लकडाउनका कारण पत्रपत्रिकाहरु प्रकाशन गर्न समस्या भैरहेको र आर्थिक कठिनाई समेत संचारकर्मी र संचार संस्थाहरुलाई हुन थालेको बताए ।
कार्यक्रमको संचालन महासंघका जिल्ला सचिव विदुर खवासले गरेका थिए । उनले धनकुटाका पत्रकारिताको अहिलेको अवस्थाको वारेमा प्रकाश पारेका थिए ।
सो अवसरमा प्रदेश कार्य समितिका अध्यक्ष विक्रम लुईटेल, महासचिव विवेक गौतमले प्रदेश कार्य समितिको तर्फबाट धनकुटाका पत्रकारहरुका लागी उपाध्यक्ष नगेन्द्र राईलाई स्वास्थ्य तथा सुरक्षित सामग्रीहरु प्रदान गरेका थिए ।
कार्यक्रममा प्रदेश कार्यसमितिका उपाध्यक्ष स्मीता निरौला, सदस्य सन्तोष रुचाल, महासंघ धनकुटाका उपाध्यक्ष सुखकला राई, सहसचिव हरिबहादुर लम्जेल, फोनिज धनकुटका अध्यक्ष सन्तवीर लामा, फोटो पत्रकार संघ धनकुटा अध्यक्ष रमेशचन्द्र अधिकारी, पत्रकार महासंघका सदस्यहरु विकास घिमिरे, कविराज घिमिरे, रेडियो मकालुका अध्यक्ष सोभिष चेम्जोङ, रेडियो भेडेटारका स्टेशन म्यानेजर पूर्णकुमार चौधरी, प्रेस युनियनका निर्वतमान अध्यक्ष यानिन्द्र तिगेला, सदस्य आशिष लावतीलगायतका पत्रकारहरुको सहभागीता रहेको थियो ।
