धनकुटा ३० बैशाख । धनकुटा इस्टिच्युट अफ हेल्थ साइन्सले आज धनकुटा नगरपालिकालाई खाद्यान्न सामग्री हस्तान्तरण गरेको छ । सो सामग्री इस्टिच्युटका सञ्चालक रामनारायण रामाले नगरपालिकाका प्रमुख चिन्तन तामाङलाई हस्तान्तरण गरेका हुन् ।
इन्स्टिच्युटले नगरपालिकालाई आफ्ना सबै कर्मचारीको २ दिनको तलब कटाएर हुन आएको ६४ हजार पाँच सय रुपैयाँबाट सामग्री खरिद गरी हस्तान्तरण गरेका हुन् । इन्स्टिच्युटले २५ केजीको ३५ बोरा मन्सुली चामल, ७० केजी दाल, ३५ केजी नुन र ३५ वटा साबुन हस्तान्तरण गरेको इन्स्टिच्युटका सञ्चालक रामाले जानकारी दिए । ती खाद्यान्न सामग्री हस्तान्तरण गर्दै इन्स्टिच्युटका प्रमुख रामाले कोरोना भाईरसको रोकथाम तथा नियन्त्रणमा सरकारबाटमात्रले सम्भव नहुने भएकाले सवैको सहयोग आवश्यक रहेको बताए । उनले सरकारले लागू गरेको एकद्वार प्रणालीबाट राहत वितरण गर्न नगरपालिकालाई इन्स्टिच्युटका तर्फबाट सानो सहयोग गरेको बताए ।
सो अवसरमा नगर प्रमुख तामाङले धनकुटा नगरपालिकाले पहिलो चरणमा २ हजार ५ सय परिवारलाई राहत वितरण गरेको जानकारी दिए । उनले अब दोस्रो चरणको राहत वितरण गर्नुपर्ने भएकाले नगरपालिकामा आर्थिक अभाव भइरहेका बेला इन्स्टिच्युटबाट प्राप्त सामग्रीले ठूलो सहयोग पुगेको बताए । नगर प्रमुख तामाङले नगरपालिकामा सामग्री सहयोग गरेकोमा इन्स्च्यिुटलाई धन्यवाद दिदै अन्य सहयोगीदाताहरुबाट पनि सहयोगको अपेक्षा गरेको जानकारी दिए ।
यस्तै इन्स्टिच्युटले श्रीपञ्चमी पार्कमा अवस्थित बाल आश्रममा आश्रित ११ जना बालबालिकालाई पाँच हजार रुपैया बराबरको खाजा सहयोग गरेको छ ।
