काठमाडौं बैशाख ३१ । धनकुटा स्थायी घर भई हाल काठमाडौं उपत्यकामा बसोवास गरिरहेका धनकुटेलीहरुलाई राहत वितरण गरिएको छ । संविधानसभाका सदस्य तथा नेपाली कांग्रेस धनकुटाका पूर्व सभापति मनोहरनारायण श्रेष्ठको पहलमा सो राहत वितरण गरिएको हो ।
सरकारले घोषणा गरेको लकडाउनको कारण दैनिक जीवन गुजारा गर्न समस्यामा परेका धनकुटेलीहरुलाई केहि राहत होस् भनेर सो राहत वितरण गरिएको सभासद् श्रेष्ठले बताए ।
सो राहत धनकुटा छोरी बुहारी समूह, सभासद् श्रेष्ठ, कांग्रेस धनकुटाका पूर्वउपसभापति अजित नारायण सिंह थापा, लवनारायण श्रेष्ठ, ज्योतिभगत श्रेष्ठ, यज्ञप्रसाद अधिकारीले सहयोग स्वरुप उपलब्ध गराई दिएको नेपाली कांग्रेस धनकुटा काठमाडौं सम्पर्क समितिका सभापति भिमबहादुर थापाले जानकारी दिए ।
सो राहत सामग्री सभासद् श्रेष्ठ, कांग्रेस महाधिवेशन प्रतिनिधि उदय लिम्बु, कांग्रेसजिल्ला सदस्य निर्मल ओझा, सम्पर्क समितिका सभापति थापालगायतले वितरण गरेका थिए । ती सामग्रीहरु समस्यामा परेका ४० जनतालाई वितरण गरिएको जनाएको छ ।
सरकारले कुनै व्यवस्था नगरी लकडाउन मात्रै थप्दै गएको कारण मजदुरी गरेर गुजारा गर्नुपर्ने वर्ग समस्यामा पर्दै गएको सभासद् श्रेष्ठले बताए । उनले राजनीतिबाट माथि उठेर त्यस्ता वर्गलाई सहयोग गर्नु पर्ने बताए ।
राहतमा प्रत्येक व्यक्तिहरुलाई चामल १५ केजी, चिउरा १ केजी, मस्यौरा १ प्याकेट, तेल १ प्याकेट, सावुन १ वटा, चिनी १ केजी, चिया १ प्याकेटका दरले वितरण गरिएको सम्पर्क समितिका सभापति थापाले जानारी दिए ।