धनकुटा २ जेष्ठ । सरकारले घोषणा गरेको लकडाउनका कारण समस्यामा परेका श्रमजीवी पत्रकारहरु र संचारगृहमा काम गर्ने श्रमिकहरुलाई आर्थिक सहयोग गरेको छ । सो सहयोग नेपाल पत्रकार महासंघ धनकुटाले गरेको हो ।
कोरोना भाईरसलाई नियन्त्रण गर्न सरकारले लगाइएको लकडाउन लामो समय भएकाले व्यवसाय सबै बन्द छ । सो कारण रोजगार संकटमा परेका श्रमजीवी पत्रकारहरुलाई र श्रमिकहरुलाई महासंघले स्थापना गरेको पत्रकार कल्याण कोषबाट तत्काल केही राहत होस् भनेर आर्थिक सहयोग गरेको जनाएको छ ।
सो राहत रकम महासंघका कार्यबाहक अध्यक्ष नगेन्द्र राईको संयोजकत्वमा भएको समितिले वितरण गरेको छ । सो अवसरमा महासंघका पूर्व केन्द्रिय उपाध्यक्ष सञ्जयसन्तोषी राई, नेपाल प्रेस युनियनका केन्द्रिय उपाध्यक्ष तथा महासंघ धनकुटाका पूर्व अध्यक्ष विजय सन्तोषी राई, सचिव बिदुर खवास, सहसचिव हरिबहादुर लम्जेलले धनकुटा २६ जनालाई पहिलो चरणमा राहत स्वरुप आर्थिक सहयोग वितरण गरेका थिए । सो अवसरमा अन्य बाँकी रहेकाहरुलाई दोस्रो चरणमा उपलब्ध गराउने सचिव विदुर खवासले बताए ।
महासंघले झण्डै १० वर्ष अघि सो कोष स्थापना गरेको थियो । सो कोषबाट विरामी वा आपत विपतमा परेका पत्रकारहरुलाई आर्थिक सहयोग गर्दे आएको छ । यस पटक पनि लकडाउनका कारण समस्यमा परेकोले सहयोग गरिएको पत्रकार महासंघका अध्यक्ष राजेश्वरबहादुर श्रेष्ठले बताए । उनले सो कोषमा सहयोग गर्नका लागि दाता महानुभावहरुलाई आग्रह समेत गरेका छन् ।