धनकुटा ५ जेष्ठ । धनकुटा उद्योग बाणिज्य संघको अनुरोधमा धनकुटा र हिलेका घरधनीहरुले घरभाडा मिनाहा गर्ने अभियानलाई आज पनि जारी छ । आजसम्म सय भन्दा बढीले घर भाडा मिनाहा गरिसकेका छन ।
कोराना भाईरसलाई नियन्त्रण गर्न सरकारले लगाएको लकडाउनको कारण व्यापार, व्यवसाय बन्द भई दिनप्रतिदिन उद्योगी, व्यापारी र व्यवसायीहरु संंकटमा पर्दै गएकाले वाणिज्य संघले संचालन गरेको घरभाडा मिनाहा अभियान अन्र्तगत घर धनीहरुले घर भाडा मिनाहा गरिरहेका छन् ।
वाणिज्य संघको आव्हान तथा अनुरोधमा तल्लो कोप्चेको घरमा संचालित टिपटप खाजा घरका साथै त्यही घरमा बस्ने सम्पूर्णलाई एक महिनाको भाडा घरधनी त्रिभुवन श्रेष्ठले मिनाहा गरिदिएको व्यवसायी राजेश श्रेष्ठले जानकारी दिए । यस्तै हिलेका धनबहादुर मोक्तान (डि.बीं मोक्तान), कौशिला बम्जन, विष्णु मोक्तान, बिनादेवी घिसिङ, बमबहादुर योञ्जन, जमुना घिसिङ, शुभचन्द्र मोक्तान, दुर्गादेवी घिसिङलगायत १७ जना घरधनीहरुले व्यापारीहरुलाई घरभाडा मिनाहा गरिदिएका छन् ।
वाणिज्य संघको अनुरोधमा लकडाउन अवधिको घरभाडा मिनाहा अभियान अन्र्तगत अहिले सम्म १ सय ९ जना घरधनीहरुले लकडाउन अवधिभरको घरभाडा व्यवसायीहरुलाई मिनाहा गरिदिएको संघका अध्यक्ष विजय सन्तोषी राईले जानकारी दिए ।
संघका अध्यक्ष राईले कोरोना भाईरसलाई फैलन नदिई नियन्त्रण गर्न लकडाउन लगाएका कारण व्यापार व्यवसाय पूर्ण रुपमा बन्द हुदाँ व्यवसायीहरु ठूलो आर्थिक संकटमा परिरहेकोले घर धनीहरुले घर भाडा मिनाहा गरी दिई महत्वपूर्ण सहयोग गरिदिएकोमा वाणिज्य संघका अध्यक्ष विजयसन्तोषी राई सवै घर धनी महानुभावहरुलाई आज धन्यवाद दिदै धनकुटा जिल्लाभरका सवै बजार क्षेत्रका घरधनीहरुलाई लकडाउन अवधिभरको घरभाडा छुट गरी दिई संकटमा सहयोग गर्न अपिल गरेका छन् ।
संघ अध्यक्ष विजयसन्तोषी राईले धनकुटा नगरपालिकाको धनकुटा बसर्पाकमा रहेको व्यापारिक भवनहरुका भाडाहरु र धनकुटा अस्पतालको व्यापारिक भवनहरुमा रहेको पसलहरुको समेत घर भाडा छुट गरिदिन हुन धनकुटा नगरपालिका र धनकुटा अस्पताल विकास समितिलाई अनुरोध गरेका छन् ।
