धनकुटा ५ जेष्ठ । जिल्ला अस्पतालमा कार्यरत स्टाफ नर्सलाई नै नोवेल कोरोना भाईरसको संक्रमण देखिएपछि अस्पतालका साथै वरिपरी क्षेत्रलाई नै सिल गरिएको छ । स्थानीय प्रशासनले अस्पताल क्षेत्रको चार किल्ला तोकेर सिल गरेको हो ।
अस्पतालमा कार्यरत नर्सलाई कोरोना देखिएपछि जिल्ला प्रशासन कार्यालयमा हिजो आइतबार राति बसेको आकस्मिक सुरक्षा प्रमुख र सरोकारवालाको बैठकले अस्पताल क्षेत्रलाई सिल गर्ने निर्णय गरेको हो । सो निर्णयसँगै धनकुटा –७ को त्रिवेणी गेटबाट, बसपार्क, जिरोप्वाइन्ट, परिचय मोड, यलम्बर चोक, सिनेमा हल हुँदै त्रिवेणी चोकसम्मको क्षेत्रलाई सिल गरिएको सहायक प्रमुख जिल्ला अधिकारी जयराम श्रेष्ठले जानकारी दिए । उनले सो क्षेत्रमा अनिश्चित कालका लागि सिल गरिएको र हुनसक्ने सम्भावित थप संक्रमितहरुको पहिचानका लागि परिक्षण थालिएको बताए ।
शनिबार ४ जना स्वास्थ्यकर्मी र १ जना सुरक्षाकर्मीको स्वाव नमुना संकलन गरी परीक्षणका लागि धरानस्थित बीपी कोइराला स्वास्थ्य विज्ञान प्रतिष्ठानको प्रयोगशाला पठाइएको थियो । संक्रतिम महिलाको पुनःपरिक्षणका लागि काठमाडौको टेकुस्थित राष्ट्रिय जनस्वास्थ्य प्रयोगशाला पठाइएको छ । अस्पतालमा कार्यरत स्वास्थ्यकर्मीलाई नै कोरोना संक्रमण देखिएपछि अस्पतालभित्र थप सतर्कता अपनाइएको अस्पतालका निमित्त मेडिकल सुरपरिटेन्डेट डा. पुजन विश्वकर्माले जानकारी दिए । डा. विश्वकर्माका अनुसा ३४ वर्षकी संक्रमित स्वास्थ्यकर्मीलाई एम्बुलेन्सबाट विराटनगरस्थित कोशी अस्पतालको कोभिड १९ उपचार केन्द्रमा पठाइएको छ ।
यसैबीच अस्पतालमा विगत १५ दिन भित्रमा आएका सबैको खोजी गरी पहिचान गर्ने र उनीहरुको स्वास्थ्य परिषण गर्ने कायृ सुरु गरिएको स्वास्थ्य कार्यालयका प्रमुख तुलसीप्रसाद गुरागाईले जनाकारी दिए ।
सिल गरिएपछि अस्पताल आसपासका क्षेत्रमा व्यापक रुपमा नेपाल प्रहरी र सशस्त्र प्रहरी परिचालन गरिएको छ । अहिले सो क्षेत्रमा सर्वसाधारणहरुलाई हिडडुलमा पूर्ण प्रतिबन्ध लगाईको सहायक प्रजिअ जयराम श्रेष्ठले जानकारी दिए ।
धनकुटामा कोरोनाको संक्रमित भेटिएसँगै आमनागरिकहरुमा त्रास छाएको छ । अहिले सर्वसाधारण घरबाट निस्कनै छाडेका छन् ।