धनकुटा, जेठ ६ । जिल्ला अस्पतालका नर्समा कोरोना भाईरसको संक्रमण देखिएसँगै स्वाव परिक्षण गरिएकोमा थप नयाँ ५ जनामा कोरोना संक्रमित देखिएको जनाएको छ । हिजो सोमवार ८३ जनाको स्वाव परिक्षणका लागि धरानस्थित वीपी कोईराला विज्ञान प्रतिष्ठानमा पठाईएकोमा मध्ये ६६ जनाको रिपोर्ट आएको छन् । जसमा ६१ जनाको रिपोर्ट नेगेटिभ देखिएको छभने ५ जनाको पोजिटिभ देखिएको हो । जसमा ४ पुरुष र १ महिला रहेको धनकुटा अस्पतालले जनाएको छ ।
बाँकी १७ जनाको स्वाव परिक्षणको रिपोर्ट आउँन वाँकी छ । उनीहरुको रिपोर्ट वुधवारसम्म आइसक्ने अस्पतालले जनाएको छ । थपिएका नयाँ विरामी मध्ये ३ जना २४, २८ र २९ वर्षका स्वास्थ्यकर्मी रहेका छन् । यस्तै एकजना ३७ वर्षका स्वास्थ्यकर्मीका परिवारका सदस्य रहेका र अर्का ३५ वर्षका सुरक्षाकर्मी रहेका छन् ।
योसँगै धनकुटामा कोरोना संक्रमितको संख्या ६ पुगेको छ । यस अघि जिल्ला अस्पताल धनकुटामा कार्यरत एक जना महिला स्वस्थ्यकर्मीलाई कोरोना पुष्टि भएको थियो । उनी अहिले विराटनगर स्थित कोरोना विशेष अस्पतालको आइसोलेसन वार्डमा उपचारत छिन् । उनको स्वास्थ्य अवस्था हाल सामान्य रहेको जिल्ला अस्पतालका सूचना अधिकारी राजन पोखरेलले जानकारी दिए । उनकाअनुसार हरेक संक्रमित व्यक्तिलाई भिन्दाभिन्दै कोठामा राखिएका छन् । संक्रमित व्यक्तिलाई समन्वय गरेर वुधवार विहान विराटनगरस्थित कोरोना विशेष अस्पतालमा पठाइने उनले बताए ।
धनकुटामा संक्रमित हुनेहरुको संख्या बढेसँगै जिल्लामा त्रासको वातावरण बढेको छ । अस्पताल क्षेत्रमा गरिएको सिलको समय बढ्न सक्ने देखिन्छ । यो अवस्थामा आमजिल्लावासीहरु सेल्फ क्वारेन्टाईनमा अनुशासित भएर बस्नुपर्ने अवस्था छ ।