धनकुटा, जेष्ठ १६ । पछिल्लो २४ घण्टामा नेपालमा कोरोना भाईरसबाट संक्रमित भएर मृत्यू हुनेहरुको संख्या ६ पुगेको छ । सो कुरा स्वास्थ्य तथा जनसंख्या मन्त्रालयले जनाएको छ । भारतबाट गत जेठ १० गते नेपाल आएका युवकमा शंका लागि भैरहवाको प्रयोगशालमा स्वाव परिक्षण गरिएको थियो । जेठ ११ गते मृत्यू भएका ती युवकको स्वाव रिपोर्ट पोजिटिभ आएको स्वास्थ्य तथा जनसंख्या मन्त्रालयका प्रवक्ता डा विकास देवकोटाले जनाएको छ । मृतक अर्घाखाँचीका ३५ वर्षीय पुरुष रहेको जनाएको छ । घर फर्किने क्रममा मृत्यु भएका युवकको शवलाई उनको आफन्तहरुले सन्धिखर्कस्थित गच्चे भन्ने स्थानमा गाडेका थिए । उनलाई कोरोना संक्रमणदेखिएसँगै उनको शव गाड्न सहभागी भएकाहरुको पनि स्वाव परिक्षण गर्नु पर्ने देखिन्छ ।
यस्तै आज थप १ सय ७० जनामा कोरोना भाईरस संक्रमण देखिएको डा देवकोटाले जनाएको छ । योसँगै नेपालमा कोरोना भाइरसको संक्रमण भएकाहरुको संख्या अहिले १ हजार २ सय १२ जना पुगेको जनाएको छ ।
यस्तै पछिल्लो २४ घण्टामा कोरोनाको उपचार गरी निको भएर १९ जना घर फर्केका छन् । यो संख्यासँगै कोरोना संक्रमणबाट मुक्त हुनेहरुको संख्या २ सय ६ पुगेको मन्त्रालयले जनाएको छ । नेपाल सरकारले कोरोना भाईरस संक्रमण हुन नदिन लकडाउन घोषणा गरेको आज ६६ दिन भएको छ ।
यसैगरी विश्वभर आजसम्म मृत्यू हुनेहरुको संख्या ३ लाख ६० हजार ६ सय ७९ जना पुगेको छ । कोरोना भाईरसबाट संक्रमित हुनेहरुको संख्या भने ५८ लाख २५ हजार ६ सय ३६ जनामा देखिएको छ । यस्तै यो भाईरसबाट मुक्त हुनेहरुको संख्या २४ लाख २८ हजार ७ सय ५० पुगेको जनाएको छ ।
सम्पन्न मुलुकको अनुपातमा नेपालमा कोरोना संक्रमित हुनेहरुको संया नगन्य देखिए पनि परिक्षणको दायरा बढाएसँगै संक्रमित हुनेहरुको संख्या पनि बृद्धि भैरहेको छ । त्यसैले आमनागरिकहरुलाई सामाजिक दुरी कायम राख्न र अति आवश्यकतामा मात्र हिडडुल गर्न विज्ञहरुले सचेत गरेका छन् ।
धनकुटामा पछिल्लो समय परिक्षण गरिएको सबैको रिपोर्ट नेगेटिभ आएको स्वास्थ्य कार्यालय धनकुटाका प्रमुख तुलसी गुरागाईले जनाएको छ ।