धनकुटा २९ जेष्ठ । सरकारले लगाएको लकडाउनमा पसल बन्द भएको अवस्थामा घरभाडा मिनाहा गरेर सहयोग गर्ने घरधनीहरुलाई सम्मान गरेको छ । विश्वमै महामारीको रुप लिएको कोरोना भाईरसको कारण व्यवसाय बन्द गरेको समयको घरभाडा मिनाहा गर्न धनकुटा उद्योग बाणिज्य संघ गरेको आग्रहलाई सहयोग गरेको भन्दै संघले दोसल्ला तथा खादा ओढाएर घरधनीलाई सम्मान गरेको छ ।
संघले सरकारले घोषणा गरेको लकडाउनको समयमा व्यापार व्यवसाय बन्द भई संकटमा परेका धनकुटाका व्यवसायीहरुलाई घर भाडा मिनाहा गरिदिई अहिलेको दुःखमा ठूलो सहयोग गर्नु भएको भन्दै संघले सम्मान गरेको संघका अध्यक्ष विजयसन्तोषी राईले बताए ।
अहिलेसम्म यसरी घरभाडा छुट गर्ने धनकुटा बजारका ६७ जना घरधनीहरुलाई संघका अध्यक्ष राई, बरिष्ठ उपाध्यक्ष मनकुमारी तितुङ्ग, कोषाध्यक्ष रुपेश श्रेष्ठ, कार्यकारी सदस्यहरु रेजिना पलिखे, अम्विका धमला, लिजा श्रेष्ठ, रेवतीप्रसाद अधिकारी, सुनिता थापा, फर्निचर व्यवसायी संघका अध्यक्ष तथा मासु व्यवसायी संघ धनकुटाका अध्यक्ष मिलन खड्गीले दोसल्ला तथा खादा ओढाएर सम्मान गरेका छन् ।
