धनकुटा २९ जेष्ठ । वर्तमान समयमा सरकारबाट भएगरेका कमजोरी हटाउन र विभिन्न माग गर्दै आज नेपाली कांग्रेस धनकुटाले प्रधानमन्त्री केपी ओलीलाई ध्यानाकर्षण पत्र पठाएको छ । सो पत्रमा पार्टीले अहिले भैरहेको आरडिटी परिक्षणलाई बन्द गरी सबैको पीसीआर परिक्षण गर्न र धनकुटा सदरमुकाममा कोरोना अस्पताल र सवै वडाहरुमा क्वारेन्टाईन स्थापना गर्नलगायतका मागहरु राखेका छन् ।
सरकारले लकडाउनलाई खुकुलो बनाएसँगै भावी दिनमा अझ महामारीको रुप लिन सक्ने कोरोना भाईरस संक्रमणलाई नियन्त्रण सो माग गरिएको जनाएको छ । सो पत्र प्रमुख जिल्ला अधिकारी केशवप्रसाद विमली मार्फत पठाएको हो ।
प्रधानमन्त्रीलाई सो पत्र पार्टीका सभापति अग्नीप्रसाद पौडेल, उपसभापति नवीनकिशोर शाक्य, सचिव विजयसन्तोषी राई, मनोनित सचिव रविन्द्र नेपाली, कोषाध्यक्ष दिनेश राई, जिल्ला सदस्य विष्णु पौडेल, पूर्व जिल्ला सहसचिव राजन पौडेललगायतका नेताहरुले प्रमुख जिल्ला अधिकारी विमलीलाई बुझाएका थिए ।
उक्त पत्र जिल्ला सचिव विजयसन्तोषी राईले वाचन गरेका थिए । सो अवसरमा जिल्ला प्रशासन कार्यालयका प्रवक्ता तथा सूचना अधिकारी जयराम श्रेष्ठको समेत उपस्थिति रहेको थियो । सो पत्रमा राहत वितरणमा राजनीतिक पूर्वाग्रह राखिएकोले निष्पक्ष तवरले वितरण गर्नुपर्ने, बनाउँदै माग राख्दै धनकुटामा तत्काल दोस्रो चरणको राहत उपलब्ध गराउन पनि माग राखिएको छ । पत्रमा लकडाउनको कारण उद्योग, व्यापार तथा पर्यटन क्षेत्र धरासायी भएकोले मापदण्ड निर्माण व्यवसाय संचालन गर्ने वातावरण बनाउन पनि माग गरिएको छ ।
यस्तै पत्रमा विदेशबाट युवाहरु फर्कने क्रम भएकोले स्थानीय स्तरमानै कृषिलाई प्रोत्साहन दिन गुणस्तरीय बल बिउलगायतका सामग्रीहरु अनुदानमा वितरण गर्न माग गरिएको छ । यस्तै फ्रन्टलाईनमा काम गर्ने चिकित्सक, स्वास्थ्यकर्मी, संचारकर्मी, एम्बुलेन्स चालक, सफाईकर्मी, कर्मचारीहरुलाई पीपीईलगायतका स्वास्थ्य सामग्रीहरु उपलब्ध गराउन पनि माग गरिएको छ ।
