काठमाडौं, जेष्ठ ३२ । विश्वमै महामारीको रुप लिदैगएको कोरोना भाईरसको कारण सरकारले लगाएको लकडाउनले समस्यामा परेका धनकुटेलीलाई राहत सामग्री वितरण गरिएको छ । सो सामग्री नेपाली कांग्रेस धनकुटा–काठमाडौं सम्पर्क समितिले संयोजनमा वितरण गरिएको हो ।
लामो समयदेखि रोजगारबिहीन भएको कारण दैनिक जीवनयापन गर्न समस्यामा परेका धनकुटा स्थायी घर भई हाल काठमाडौंमा बसोवास गरिरहेका धनकुटेलीहरुलाई सो सामग्री वितरण गरिएको समसतिका अध्यक्ष भिमबहादुर थापाले बताए । समितिले यस अघि पनि यसरी समस्यामा परेकाहरुलाई राहत सामग्री वितरण गरिसकेको जनाएको छ । सो वितरण गरिएको राहत सामग्री धनकुटेलीहरु डेरा लिएर बसेकै स्थान बालाजु, टोखा, छाउनी, नारायण थान, बौद्ध, कोटेश्वर, धापाखेल, धुम्बाराहीलगायतमा गएर ३१ परिवारलाई हस्तान्तरण गरिएको अध्यक्ष थापाले बताए ।
सो राहत सामग्री वितरण कार्यमा नेपाली कांग्रेसका धनकुटाका महाधिवेन प्रतिनिधि उदयबहादुर लिम्बु, कांग्रेस धनकुटाका जिल्ला सदस्य निर्मल ओझासमेत सहभागी रहेको सम्पर्क समितिका सभापति थापाजानकारी दिए । थापाका अनुसार यो राहत सामग्रीले लकडाउनका कारण दैनिक जीवनयापन समस्यामा परेका धनकुटेलीलाई थोरै भएपनि राहत पुगोस् भनेर दैनिक आवश्यक पर्ने खाद्य सामग्री वितरण गरिएको बताए ।
अध्यक्ष थापाले सो सामग्री वितरण गर्नका लागि धनकुटा घर भई हाल काठमाडौंमै बसोवास गरिरहेका समाजसेवीहरु पूर्वरथि कृष्णनारायण सिंह थापा, सल्भ नेपालका अध्यक्ष राजेन्द्रबहादुर प्रधान, प्राध्यापक गोपालप्रसाद अधिकारी, टंक दुवाडी र ट्रेड युनियन कांग्रेसका पूर्व उपाध्यक्ष गणेशप्रसाद निरौलालगायतले आर्थिक रुपमा सहयोग गरेको जानकारी दिए । अध्यक्ष थापाले कोहि पनि धनकुटेलीहरु काठमाडौंमा भोकै नपरुन् भनेर वितरण गरिएको र आगामी दिनमा पनि पर्नसक्ने यस्ता समस्याहरुमा सहयोगका लागि दाता महानुभावहरुलाई आग्रह गरे । उनले राहत वितरणमा राजनीतिक पूर्वाग्रह नराखी आवश्यकता भएका धनकुटेलीहरुलाई वितरण गरिएको पनि जानकारी दिए ।