धनकुटा ८ असार । संक्रमित ८ जनाको उपचार भएपछि धनकुटा अहिले कोरोनामुक्त जिल्ला भएको छ । अब पुनः संक्रमण फैलन नदिन र बाढी पहिरो लगायत अन्य हुनसक्ने विपतहरुलाई रोक्न प्रभावकारी अभियान संचालन गर्ने आज विपत व्यवस्थापन समितिले निर्णय गरेको छ ।
प्रमुख जिल्ला अधिकारी तथा जिल्ला विपत व्यवस्थापन समितिको आज सम्पन्न बैठकले जिल्लामा कोरोना भाईरस फैलन नदिन र यो मौसममा बाढी पहिरोलगायतका विपतबाट हुनसक्ने ठूलो धनजनबाट जोगाउन सबै स्थानीय तह तथा सरोकारवाला निकायहरुले प्रभावकारी रुपमा अभियान संचालन गर्ने निर्णय गरेको हो ।
सो बैठकमा जिल्ला समन्वय समितिका प्रमुख टंकबहादुर चुवान, धनकुटा नगरपालिकाका प्रमुख चिन्तन तामाङ, बरख गण सल्लेरी व्यारेकका गणपति कर्णेल भगवान थापा, जिल्ला प्रहरी प्रमुख एसपी गोविन्द धिकारी, नेकपाका जिल्लासचिव ऋषिराम ढुंगाना, कांग्रेस जिल्ला कोषाध्यक्ष दिनेश राई, जनता समाजवादी पार्टी जिल्ला अध्यक्ष बलबहादुर राई, उद्योग बाणिज्य संघका अध्यक्ष विजयसन्तोषी राई, पत्रकार महासंघका उपाध्यक्ष नगेन्द्र राई, जिल्ला शिक्षा समन्वय इकाईका प्रमुख मनकुमारी राई, सामुदायिक बन उपभोक्ता महासंघका अध्यक्ष निलबहादुर थापा लगायतले सुझाव दिएका थिए । उनीहरुले कोरोना संक्रमितहरु सवैको उपचार भएर फर्किसकेकाले धनकुटा कोराना मुक्त जिल्ला भएको भन्दै अब संक्रमण फैलन नदिन सावधानी अपनाउनु पर्ने बताएका थिए ।
बैठकले विपत पूर्व तयारी प्रतिकार्य योजना र मौसम परिर्वतन पूर्व तयारी प्रतिकार्यत्मक योजना तयार गरी पास गरेको सहायक प्रमुख जिल्ला अधिकारी भोजराज श्रेष्ठले जानकारी दिए ।