धनकुटा १ भदौं । अविरल बर्षाले धनकुटा नगरपालिका वडा नं. ५ स्थित तल्लो टुडिखेलमा ठूलो क्षति पुगेको छ । बर्षाको पानी सिपेज भई प्याराफिटमा बग्दा टुंडिखेलको पर्खाल ढलेको छ भने प्याराफिटका केहि भाग धसिएको छ ।
करिव ३० रोपनी क्षेत्रफलमा फैलिएको सो टुंडिखेलमा पर्खाल र प्याराफिट ३ वर्ष अघिमात्र पुनर्निर्माण गरिएको थियो । करोडौंको लगानीमा पुनर्निर्माण गरिएको पछि टुंडिखेल आकर्षक देखीएको थियो ।
बर्षाले टुंडिखेलको पूर्वउत्तरतिर निर्माण भएको सडकसमेत भासिएको छ । कालोपत्र गरिएको सडकमा व्यवस्थित ढल निर्माण नहुँदा वर्षाको पानी सिपेज भई टुडिखेलमा क्षति भएको हो । यस्तै पश्चिम दिशातिर निर्माण गरिएको मञ्चसहितको जिल्ला खेलकुद विकास समितिको कार्यालयमा पनि क्षति पुगेको छ ।
मञ्च अगाडिको जमिन भासिएको कारण कार्यालय भवन भित्रबाट पानी छिर्दा कार्यालयमा जोखिम बढेको छ । यस टुडिखेललाई थप स्तरीय तथा व्यवस्थित् बनाउन पश्चिमतर्फ थप प्याराफिट निर्माण भईरहेको जिल्ला खेलकुद विकास समितिको कार्यालय प्रमुख नवीन प्रधानले बताए ।
सम्भावित क्षतिलाई मध्यनजर गर्दै मञ्च छेउमा निर्माण गरिएको फुटबलको प्रतिमा निकालिएको फटवल प्रशिक्षक सुमन श्रेष्ठले जानकारी दिए ।
नेपालकै पहाडी जिल्लाहरुमा व्यवस्थित र सुविधा सम्पन्न फुटवल मैदानका रुपमा स्थापित यो टुंडिखेल निर्माणमा हालसम्म केन्द्र, प्रदेश र स्थानीय सरकारले करोडौं रुपैया लगानी गरिसकेका छन् । तर, पानी निकासको उचित व्यवस्था नहुदाँ खेलमैदान क्षति भएको छ । खेलमैदान निर्माणको लागी धनकुटा नगरपालिकाले आ.व.०७२÷०७३ मा ४५ लाख, आ.व.०७३÷०७४ मा ४७ लाख ६२ हजार चार सय ६८ रुपैयाँ, ०७४÷०७५ मा २६ लाख ४६ हजार, १ सय ७ रुपैयाँ खर्च गरेको थियो । यस्तै प्रदेश सरकारबाट आ.व.०७५÷०७६ मा ५० लाख, ०७६÷०७७ मा ६० लाख लगानी गरेको छ । यस अघि पनि लाखौं रुपयाँ यस खेलमैदानमा लगानी भैसकेको छ ।
खेलमैदानमा भएको क्षतिका वारेमा संघीय सांसद, प्रदेश सांसद, धनकुटा नगरपालिका, जिल्ला प्रशासन कार्यालय लगायतका निकायहरुमा जानकारी गराई सकेको धनकुटा फुटबल संघका अध्यक्ष गोविन्द राईले जानकारी दिए । प्याराफिट तथा पर्खाल तत्काल मर्मत सम्भार नगरिए पछि ठूलो रकम लाग्ने अध्यक्ष राईले बताए ।
भासिएको सडकमा ठूलो भारबहनको सवारी साधन चलाए थप क्षति हुने जोखिम छ । यसअघि प्याराफिट २०४३ सालताका पनि भारी बर्षाले भासिएको तत्कालीन धनकुटा नगरपञ्चायतका प्रधानपञ्च तथा सल्भ नेपालका कार्यकारी निर्देशक राजेन्द्रबहादुर प्रधानले जानकारी दिए ।
