धनकुटा १० भाद्र । विश्वव्यापी रुपमा फैलिरहेको कोरोना भाईरस संक्रमितको उपचार अव धनकुटामा नै हुने छ । सो सम्बन्धि जानकारी धनकुटा अस्पतालका प्रमुख डा. पुजन विश्वकर्माले दिएका हुन् ।
केहि दिन अघिको जिल्ला कोभिड १९ जोखिम व्यवस्थापन केन्द्र (डिसीसीएमसी) बैठकले धनकुटा नगरपालिका वडा नं. ६ स्थित औद्योगिक ग्राममा ४० वटा आईसोलेशन कक्ष स्थापना गरी संचालन गर्ने निर्णय भएको थियो । सो निर्णयबमोजिम आईसोलेशन कक्ष स्थापना गरिएको छ । सो कक्ष आगामी भाद्र १४ गते आईतवारदेखि संचालन गरिने अस्पतालका प्रमुख डा. पुजन विश्वकर्माले जानकारी दिए । प्रदेश सरकारको सहयोगमा स्थापित सो आईसोलेशन कक्षमा कोरोना भाईरस संक्रमितहरुको उपचारसमेत हुने छ ।
प्रमुख जिल्ला अधिकारी तथा डीसीसीएमसीका अध्यक्ष केशव प्रसाद बिमलीको अध्यक्षतमा भएको कोरोना भाईरस नियन्त्रण तथा रोकथाम सम्वन्धि बैठक सम्पन्न भएको छ । सो बैठकमा संघीय सरकारबाट ६ वटा भेन्टिलेटर र ४ वडा आईसियू सहित १० वार्ड स्थापना गर्नका लागी दुई करोड आएको जानकारी दिए । यस्तै पीसीआर मेसिन खरिद गर्नका लागि थप एक करोड रुपैया आएको अस्पतालका प्रमुख डा. पुजन विश्वकर्माले बताए । सो सामग्री खरिद गर्ने प्रक्रिया चाडै अगाडि बढाईने डा. बिश्वकर्माले बताए ।
सो कक्ष स्थापना भएपछि कोरोना भाईरसबाट संक्रमित विरामीहरु उपचारका लागी बाहिर जान पर्ने छैन । यसलाई अझ साधन स्रोत सम्पन्न बनाउन उद्योग बाणिज्य संघ तयार रहेको संघका अध्यक्ष विजय सन्तोषी राईले बताए ।