धनकुटा १० भाद्र । आज बसेको जिल्ला कोभिड १९ जोखिम व्यवस्थापन केन्द्र (डिसीसीएमसी) को बैठकको निर्णयले आगामी भदौं १७ गते राती २ वजेसम्मका लागि जिल्लाभर लकडाउन थपिएको छ । यो लकडाउनमा विगतको भन्दा केहि खुकुलो बनाउँदै मोडालिटी परिर्वतन गरेको छ ।
बैठक प्रमुख जिल्ला अधिकारी तथा डीसीसीएमसीका अध्यक्ष केशवप्रसाद बिमलीको अध्यक्षतमा सम्पन्न भएको थियो । बैठकले कोरोना भाईरसका विरामीहरुको सम्पर्कका रहेका व्यक्तिहरुको पीसीआर नतिजा नआएकाले कोरोना भाईरस समुदायमा फैलिन नदिनका लागी सो निर्णय गरिएको सहायक प्रमुख जिल्ला अधिकारी भोजराज श्रेष्ठले जानकारी दिए ।
पहिलेको लकडाउनमा दैनिक उपभोग्य तथा अत्यावश्यक सामग्रीहरुमात्रै खुल्दै आएका थिए । तर, यो लकडाउनमा सम्पूर्ण उपभोग्य वस्तुका पसलहरु विहान ७ बजेदेखि १० बजेसम्म र साझ ५ बजेदेखि ७ बजे सम्म खुल्ला रहने निर्णय भएको धनकुटा उद्योग बाणिज्य संघका अध्यक्ष विजयसन्तोषी राईले जानकारी दिए ।
बैठकले जिल्लाका सबै कार्यालयहरुका कर्मचारीहरु जिल्ला छाडेर जानु परेमा प्रमुख जिल्ला अधिकारीको अनुमती लिएरमात्र जान पाउने निर्णय गरेको छ । यस्तै जिल्लामा बैठक, सभा सम्मेलन, गोष्ठी, अन्तक्र्रियालगायत धेरै भेला हुने कार्यक्रमहरु ीनषेध गर्ने निर्णय गरिएको छ ।
बैठकमा जिल्ला समन्वय समितिका प्रमुख टंक चुवान, बरखगण सल्लेरी ब्यारेकका गणपति कर्णेल भगवान थापा मगर, जिल्ला प्रहरी कार्यालयका प्रमुख एसपी गोविन्द अधिकारी, सशस्त्र प्रहरी बल ६ नम्वर गुल्म छिन्ताङ्गका गुल्मपति डिएसपी रामचन्द्र श्रेष्ठ, राष्ट्रिय अनुसन्धानका प्रमुख तुलसी कटेल, धनकुटा नगरपालिकाका प्रमुख प्रशासकीय अधिकृत राम बहादुर थापा, जिल्ला समन्वय अधिकारी रामनारायण श्रेष्ठ, स्वास्थ्य कार्यालयका निमित्त प्रमुख तुलसीप्रसाद गुरागाई, उद्योग बाणिज्य संघका अध्यक्ष विजयसन्तोषी राई, जिल्ला प्रशासन कार्यालयका प्रशासकीय अधिकृत जयराम श्रेष्ठ, धनकुटा अस्पतालका प्रमुख डा.पुजन विश्वकर्मा, नेपाल रेडक्रस सोसाईटीका मन्त्री छत्र श्रेष्ठलगायतको सहभागिता रहेको थियो ।
यस्तै लकडाउनलाई प्रभावकारी रुपमा लागू गर्न माक्स लगाउन अनिवार्य गरिएको छ । बैठकले पहिले भेडेटारमा मात्र चेकजाँच गरिरहेकोमा अब मुलघाटमा पनि चेकजाँच गरी अनुगमन गर्ने निर्णय भएको जिल्ला प्रशासन कार्यालयका नायक सुब्बा रत्न दर्लामीले जानकारी दिए ।
