धनकुटा १३ भाद्र । धनकुटामा आज एकैपटक १९ जनामा कोरोना भाईरस कोभिड १९ को संक्रमण देखिएको छ । धरानस्थित वीपी कोईराला स्वास्थ्य विज्ञान प्रतिष्ठानमा ११ गते पठाईएको स्वाव परिक्षणबाट उनीहरुको पोजिटिभ देखिएको स्वास्थ्य कार्यालयका प्रमुख तुलसी गुरागाईले जानकारी दिए ।
धनकुटाबाट एक सय २७ जनाको स्वाव परिक्षणका लागि पठाईएकोमा बाँकी सबैको नेगेटिभ आएको छ । संक्रमितहरुलाई भर्खरै निर्माण भैरहेको आईसोलेसन कक्षमा राख्ने तयारी भैरहेको जिल्ला अस्पतालका प्रमुख डा. पुनज विश्वकर्माले जानकारी दिए ।
यसरी संक्रमित हुनेहरुमा एक व्यापारी, ४ जना नेपाल टेलिकम धनकुटाका कर्मचारी, १ जना बैंकका कर्मचारी र १३ जना प्रहरी रहेको प्रमुख गुरागाईले जानकारी दिए ।
संक्रमित १३ जना प्रहरी श्रावण यता सरुवा भएर आएको जिल्ला प्रहरी प्रमुख एसपी गोविन्द अधिकारीले जानकारी दिए । उनीहरु प्रहरी गण विराटनगर, जिल्ला प्रहरी कार्यालय सुनसरी र झापाबाट सरुवा भई आएका थिए ।
सरकार २ सय जना भन्दा बढी संक्रमित रहेको जिल्लाबाट सर्वसाधारण नागरिकलाई आउन प्रतिवन्ध लगाएको छ । तर, सरकार आफै त्यस्ता जिल्लाबाट संक्रमित कम भएको जिल्लाहरुमा प्रहरी कर्मचारीहरु सरुवा गरेर संक्रमण फैलाईरहेको छ ।
संक्रमितहरुको स्वाव परिक्षणमा पठाईएको भएपनि उनीहरु क्वारेन्टाईनमा नबसी आआफ्नो पेसामा कार्यरत रहेको स्थानीयहरु बताउँछन् । उनीहरुले अन्यलाई पनि सारेको हुनसक्ने आशंका छ । कम्तिमा पनि स्वाव परिक्षणमा पठाईएको व्यक्तिहरुलाई नतिजा नआउञ्जेल अनिवार्य क्यारेन्टाईनमा राख्ने व्यवस्था गर्नुपर्ने स्थानीय विजयशेखर श्रेष्ठ बताउँछन् ।
जिल्लामा यो संख्यामा संक्रमित अहिलेसम्मकै ठूलो हो । हालसम्म जिल्लामा संक्रमित हुनेहरुको संख्या ३९ पुगेको छ । संक्रमित हुने मध्ये १७ जना निको भएर घर फर्किईसकेका छन् ।