धनकुटा भदौं १३ । प्रदेश १ का सामाजिक विकास मन्त्री जीवन घिमिरे यस क्षेत्रमा कोरोना भाईरसको संक्रमण बढेसँगै परिक्षणका लागि धनकुटामा छाडै पीसीआर मेसिन जडान गर्ने जानकारी दिए । उनले मेसिन जडानको प्रक्रिया अन्तिम चरणमा रहेको जानकारी दिए ।
मन्त्री घिमिरे शिक्षण अस्पताल स्थापनाका लागि अनुगमन गर्न आउने क्रममा जिल्ला समन्वय समितिको सभाहलमा भएको छलफल कार्यक्रममा सो जानकारी दिएका हुन् । सो अवसरमा उनले धनकुटा अस्पतालको स्तरोन्नति गरी चाडै एक सय बेडको बनाईने जानकारी दिए । उनले प्रदेश सरकारले बनाउने भनिएको शिक्षण अस्पतालका लागि विज्ञ समिति बनाई समितिको प्रतिवेदनअनुसार कार्य अगाडि बढाईने जानकारी दिए ।
सो अवसरमा मन्त्री घिमिरेले बीपी कोइराला स्वास्थ्य विज्ञान प्रतिष्ठान, कोशी अस्पताल, प्रदेश अस्पताल र मेची अस्पताल पछि अब धनकुटा र पाँचथरमा पीसीआर मेसिन जडान गर्न लागिएको बताए । उनले धनकुटामा जडान हुने मेसिनले साविक कोशी अञ्चलका ४ पहाडी जिल्ला र पाँचथरमा जडान गरिने मेसिनले साविक मेचीका ३ पहाडी जिल्लाको स्वाव परिक्षण गरिने जानकारी दिए । उनले पीसीआर मेसिन जडान गर्न प्रदेश सरकार र प्रदेश सरकारको सिफारिसमा केन्द्रिय सरकारबाट पनि बजेट विनीयोजन भएको बताए ।
सो अवसरमा मन्त्री घिमिरेले प्रदेश १ का भारतसँग सीमाना जोडिएका जिल्लाहरु इलाम, झापा, मोरङ र सुनसरीमा कोरोना भाइरस सक्रमण बढिरहेको जानकारी दिए । उनले खुल्ला सीमानाको कारण नियन्त्रण गर्न समस्या भएकोसमेत जानकारी दिए । उनले अन्य जिल्लाहरुमा भने कम खतरा रहेको बताए ।
सो अवसरमा पत्रकार महासंघका अध्यक्ष राजेश्वरबहादुर श्रेष्ठले धनकुटामा कोरोना भाईरसको संक्रमण कर्मचारीहरुको सरुवाको कारण पनि फैलिरहेकोले तत्काल सरुवा गर्ने कार्य स्थगित गर्न माग गरे । उनले धनकुटालाई पुनर्जीवन दिन शिक्षण अस्पताल यथाशीघ्र सञ्चालन गर्नु पर्ने बताए ।
जिल्ला समन्वय समितिका प्रमुख टंक चुवानको अध्यक्षतामा सम्पन्न कार्यक्रममा संघीय सांसद राजेन्द्रकुमार राई, प्रदेश सांसद तथा विधायन समितिका संयोजक इन्द्रमणि पराजुली, सांसद निरन राई, धनकुटा नगरालिकाका प्रमुख चिन्तन तामाङ, प्रमुख जिल्ला अधिकारी केशवप्रसाद विमली, रेडक्रस सोसाईटीका अध्यक्ष हरि राई, उद्योग वाणिज्य संघका उपाध्यक्ष तारा तितुङलगायतको उपस्थिति रहेको थियो ।
सो छलफल कार्यक्रम पछि मन्त्री घिमिरेले शिक्षण अस्पतालका लागि सिफारिस गरेको प्रदेश स्वास्थ्य निर्देशनालय, तालिम केन्द्र, जिल्ला अस्पताल, स्वास्थ्य कार्यालयका साथै आइसोलेसन कक्षको अनुगमन गरेका थिए ।
