धनकुटा भदौं १३ । धनकुटामा कोरोना भाईरस (कोभिड १९) बाट संक्रमित एकै पटक १९ जना भेटिएपछि धनकुटावासीमा त्रास फैलिएको छ । यो हल्ला चलेसँगै वजार सुनसान भएको छ । यो अवस्थामा व्यवसायीलगायत जिल्लावासीहरुलाई आतंकित नभई संयमित हुन आज धनकुटा उद्योग बाणिज्य संघले विज्ञप्ती प्रकाशित गरी आव्हन गरेको छ ।
संघका अध्यक्ष विजयसन्तोषी राई र महासचिव रामबहादुर गोङ्वा तामाङद्वारा हस्ताक्षरित विज्ञप्तीमा आज १३ प्रहरी, ४ जना टेलिकमका कर्मचारी र एक एक व्यवसायी र बैंकका प्रन्धकलाई संक्रमण देखिएसंगै समुदायस्तरमा फैलनसक्ने भएकोले व्यवसायीलगायत समस्त जिल्लावासीहरुमा संयमित भई सचेत र सजग रहन आग्रह गरेका छन् ।
विज्ञप्तीमा समुदाय स्तरमा संक्रमण फैलन नदिन मास्क लगाउने, सामाजिक दुरी कायम गर्ने, वारम्वार सावुन पानी वा सेनिटाईजरले हात सफा गर्न जोड दिएको छ । यस्तै अत्यावश्यक काम वाहेक घरबाट ननिस्कन समेत संघले विज्ञप्ती मार्फत अनुरोध गरेको छ ।
जिल्लामा हालसम्म १ हजार ५ सय ९३ जनाको पीसीआर र १ हजार १ सय ३८ जनाको आरडिटी परिक्षण गरिएकोमा अहिलेसम्म ३९ जनामा कोरोना भाईरस संक्रमण देखिएको छ । यस्तै १७ जना उपचार पछि निको भै घर फर्केका छन् ।