धनकुटा २२ भाद्र । कोरोना भाईरसको संक्रमण बढेसँगै जारी लकडाउन तथा निषेधाज्ञा भोलीदेखि हटाईएका छ । सो निर्णय जिल्ला प्रशासन कार्यालयमा जिल्लास्तरीय कोभिड संकट व्यवस्थापन केन्द्र (डीसीसीएमसी) को बैठकले गरेको हो ।
केन्द्रको बैठकले सिफारिस गरेअनुसार प्रमुख जिल्ला अधिकारी केशवप्रसाद विमलीले सूचना जारी गर्दै लकडाउन तथा निषेधाज्ञा हटाएका हुन् ।
समुदाय स्तरमा कोरोना भाईरस फैलदै गएपछि यसलाई नियन्त्रण गर्न चार हप्तादेखि लकडाउन लगाउँदै आएको थियो । अहिले अवस्था सहज भएको र संक्रमण नियन्त्रणमा नै भएको देखिएकोले प्रजिअ तथा केन्द्रका अध्यक्ष केशवप्रसाद विमलीको अध्यक्षमा बसेको डीसीसीएमसीको बैठकले हटाउने सिफारिस गरेको सहायक प्रजिअ भोजराज श्रेष्ठले जानकारी दिए ।
भोली २३ गतेदेखि व्यापार व्यवसाय सञ्चालन गर्न पाउने छन् । तर, पहिलेको जस्तो स्वास्थ्य सचेतना अपनाइ सामाजिक दुरी कायम गर्दै व्यवसाय सञ्चालन गर्नु पर्ने जारी सूचनामा जनाएको छ । यस्तै व्यवसायीहरुले माक्स लगाउनु पर्ने, स्यानिटाईजर राख्नुपर्ने निर्देशन गरेको छ ।
लकडाउन हटाएपनि यो अर्को सूचना जारी नभएसम्म विद्यालय, क्याम्पस संचालन गर्न पाईने छैन । सभा सम्मेलन, भेला अन्र्तक्रिया, गोष्ठीलगायतका बैठकहरु गर्न पाईने छैन । यस्तै साप्ताहिक हाटबजारलाई पनि निषेध गरिएको छ भने सार्वजनिक यात्रुबाहक यातायातका साधन आधा यात्रु राखेर जिल्लाभित्र चलाउन पाईने छ ।
लामो समयदेखिको लकडाउन हुदाँ व्यापार व्यवसाय ठप्प छन् । यसले व्यवसायीहरुलाई घर भाडा तिर्न समेत समस्यामा परेका छन् । यसबाहेक बैंकको ऋणको किस्ता बुझाउन, घर व्यवहार संचालन गर्न समेत ठूलो कठिनाई भएकोले तत्काल लकडाउन हटाई ब्यापार व्यवसाय संचालन गर्ने वातावारण बनाई दिन भन्दै आज विहान धनकुटा उद्योग वाणिज्य संघले प्रजिअलाई पत्र बुझाएको थियो ।
अहिले धनकुटामा २० जना आईसोलेशनमा रहेका छन् । १९ जना धनकुटा नगरपालिका वडा नं. ६ स्थित आईसोलेसन कक्षमा र एक जना शहीदभूमिमा बसेका छन् । यस्तै ११ जना क्वारेन्टाईनमा र २४ जना होम क्वारेन्टाइनमा रहेको प्रशासनले जनाएको छ ।
