धनकुटा २९ भाद्र । विश्वव्यापी महामारीका रुपमा फैलिरहेको कोरोना भाईरस (कोभिड–१९) को संक्रमण नियन्त्रणका लागि सरकारले आवश्यकताअनुसार समय समयमा लकडाउन लगाउँदै आएको छ । यस्तो समयमा पनि समाचारका लागि क्रियाशील हुनुपर्ने सञ्चारकर्मीहरुको पहिचानका लागि आवश्यक प्रेस ज्याकेट हस्तान्तरण गरिएको छ ।
सो ज्याकेट अमेरिकास्थित घ्याल्सुम्दो सेवा संस्थाका पूर्व अध्यक्ष छिरिङ राप्के लामा र धनकुटा घर भई हाल अमेरिकामा बसोवास गर्दै आएका मुकुन्द सुवेदीको सहयोगमा निशानदेवी मिडिया प्रालिले उपलब्ध गराएका हुन् । नेपाल पत्रकार महासंघका केन्द्रिय सदस्यसमेत रहेका निशानदेवी मिडियाका प्रधान सम्पादक गोपाल बराईलीले १० थान प्रेस ज्याकेट पत्रकार महासंघ धनकुटाका अध्यक्ष राजेश्वरबहादुर श्रेष्ठलाई एक कार्यक्रमकावीच हस्तान्तरण गरेका हुन् ।
सो अवसरमा महासंघलाई ज्याकेटका साथै मास्क, भाइजर, फेससिल्ड समेत हस्तान्तरण गरिएको थियो । सो अवसरमा केन्द्रिय सदस्य गोपाल बराईलीले वर्तमान अवस्थामा अग्रमोर्चामा जोखिम मोलेर समाचार संकलनका लागि खटिनु पर्ने सञ्चारकर्मीहरुलाई आवश्यक पर्ने ज्याकेट र स्वास्थ्य सुरक्षा सामग्री उपलब्ध गराएको बताए । उनले अमेरिकामा रहेका मित्रहरुको सहयोगमा देशका विभिन्न जिल्लाहरुमा यस्ता सामग्री उपलब्ध गराउने कार्यक्रम रहेको जानकारी दिए ।
सो अवसरमा प्रदेश महासंघका सदस्य सन्तोष रुचाल, प्रेस युनियनका सचिव विकास घिमिरे, प्रेस संगठनका सहसंयोजक इश्वर थापा, फोनिज धनकुटाका अध्यक्ष सन्तवीर लामालगायतले वर्तमान अवस्थामा धनकुटाका सञ्चारकर्मीहरुलाई पहिचान दिने ज्याकेट र स्वास्थ्य सामग्री उपलब्ध गराई दिएकोमा सहयोगी संस्थाहरुलाई धन्यवाद दिए । कार्यक्रम महासंघ जिल्ला अध्यक्ष राजेश्वरबहादुर श्रेष्ठको अध्यक्षतामा सम्पन्न भएको थियो ।
सो अवसरमा कार्यक्रमा फोनिज प्रदेश समितिका महासचिव तथा पत्रकार महासंघ जिल्ला सचिव विदुर खवास, सहसचिव हरिबहादुर लम्जेल, फोनिज प्रदेश सदस्य टिएल राई, पत्रकारहरु शोविस चेम्जोङ, पूर्णकुमार चौधरी, सरिता बराइली, कोकिला भण्डारीलगायतको उपस्थिति रहेको थियो ।
