धनकुटा २९ भाद्र । कोरोना भाईरस संक्रमण फैलिएसँगै देश लकडाउनको अवस्थामा छ । लकडाउनसँगै होटल व्यवसाय बन्द छन् । यस्तो अवस्थामा पनि सरकारले व्यवसायीहरुलाई कुनै प्रकारको राहत दिएका छैनन् । अझ नवीकरण लगायतको शुल्क बृद्धि गरेका छन् ।
यस सम्बन्धमा स्वास्थ्य मापदण्ड पुरा गरेर होटल व्यवसाय सुचारु रुपमा सञ्चालन पाउनु पर्ने माग राख्दै पर्यटकीयस्थल भेडेटारका होटल व्यवसायी तथा पर्यटन व्यवसायीहरुले ज्ञापनपत्र बुझाएका छन् । भेडेटार होटल एशोसिएशनको नेतृत्वमा आज जिल्ला प्रशासन कार्यालय, जिल्ला प्रहरी कार्यालय तथा धनकुटा उद्योग वाणिव्य संघलाई ज्ञापन पत्र बुझाएको एशोसियशनका अध्यक्ष जितेन्द्र रुम्दालीले बताए ।
सो ज्ञापनपत्र जिल्ला प्रशासन कार्यालयमा निमित्त प्रमुख जिल्ला अधिकारी भोजराज श्रेष्ठ र प्रशासकीय अधिकृत जयराम श्रेष्ठलाई बुझाएका हुन् । यस्तै जिल्ला प्रहरी कार्यालयका डिएसपी ध्रुव श्रेष्ठ र धनकुटा उद्योग बाणिज्य संघका अध्यक्ष विजय सन्तोषी राईलाई बुझाएका हुन् । सो ज्ञापनपत्रमा लामो समयलदेखिको लकडाउनले व्यवसाय धरायसी भएको र अब पनि लम्विए रोगले भन्दा भोकले मर्ने अवस्था सृजना भएको जनाएको छ । उनीहरुले सरकारले आयोजना गरेको नेपाल भ्रमण वर्ष २०२० लाई सफल बनाउन करोडौ ऋण लिएर व्यवसाय सञ्चालन गरेको अवस्थामा ठूलो मारमा परेको उल्लेख गर्दै आगामी असोज १ गतेदेखि सुचारु ग्र्ने वातावरण मिलाई दिन आग्रह गरेका छन् । ज्ञापनपत्र बुझाउन एशोशियसनका अध्यक्ष जितेन्द्र राई, महासचिव आशिष राई, सचिव तुमराज लिम्बु , सदस्य डम्वर लामिछानेको सहभागिता थियो ।
सो अवसरमा वाणिज्य संघका अध्यक्ष विजयसन्तोषी राईले कोभिड १९ नियन्त्रणका लागि अन्य विकल्प खोज्नु पर्ने सुझाव दिदै लकडाउनमात्र समाधान नभएकोले बताए । उनले सुरक्षा विधि अपनाएर सम्पूर्ण व्यवसाय संचालन गर्न राज्यले अनुमति दिनु पर्ने बताए । उनले कि सरकारले कर तथा ब्याज पूर्ण रुपमा छुटसहित राहत देओस् या सम्पूर्ण व्यवसाय सञ्चालन गर्न अनुमति देओस् भन्दै दुवै नभए व्यवसायीहरुले आन्दोलनको विकल्प नभएको बताए ।
ज्ञापनपत्रमा यस क्षेत्रको पर्यटकीय स्थलहरु भेडेटार, नाम्जे, नमस्ते झरना लगायतका क्षेत्रहरुमा पूर्ण रुपमा यातायत संचालन गर्न दिनु पर्ने र होटल पनि संचालन गर्न दिनु पर्ने माग गरेका छन् ।