धनकुटा ३० भाद्र । धनकुटा उद्योग बाणिज्य संघले व्युटीपार्लर र सेलुन व्यवसायीहरुलाई सुरक्षित सामग्री वितरण गरेको छ । संघले व्यवसायीहरुलाई सेवा प्रवाह गर्न आफु र सेवाग्राहीहरुको सुरक्षाको लागि आवश्यक पर्ने फेस सिल, मास्क, सेनिटाईजरलगायत सुरक्षित सामग्रीहरु वितरण गरेको हो ।
सो अवसरमा व्यवसायीहरुले ६ महिनादेखि सरकारले लगाएको लकडाउनका कारण व्यवसाय बन्द भएकोले संकटमा परेको गुनासो व्यवसायीहरुले गरे । नेपाल सौन्र्दय कला व्यवसायी संघ र नेपाल नाई संघका पदाधिकारीहरुले व्यवसाय सुचारु रुपमा सञ्चालन गर्ने वातावरण बनाईदिन आग्रह गरेका छन् । सो अवसरमा संघले स्थानीय प्रासनसँग छलफल गरी सरकारले तोकेको मापदण्ड पुरा गरी सुरक्षित तरिकाले व्यवसाय सञ्चालन गर्ने वारेमा पहल भैरहेको बाणिज्य संघका अध्यक्ष विजय सन्तोषी राईले जानकारी दिए ।
सो अवसरमा संघका अध्यक्ष राई, नेपाल पत्रकार महासंघका अध्यक्ष राजेश्वरबहादुर श्रेष्ठ, घरेलु तथा साना उद्योग महासंघका केन्द्रिय सदस्य रेणु श्रेष्ठ, संघका वरिष्ठ उपाध्यक्ष मन कुमारी तितुङ, कोषाध्यक्ष रुपेश श्रेष्ठ, सदस्यहरु रेवतीप्रसाद अधिकारी, अम्विका धमला, लीजा श्रेष्ठ, शोभा श्रेष्ठ लगायतले सुरक्षित तथा स्वास्थ्य सामग्रीहरु प्रदान गरेका थिए ।
सो अवसरमा सौन्र्दय कला व्यवसायी संघका अध्यक्ष किरण श्रेष्ठ, रेणु श्रेष्ठ, कुसुम जोशी श्रेष्ठ, मनु श्रेष्ठलगायतले अहिले अन्य पेसा भन्दा बढी आफुहरु मारमा परेको बताए । उनीहरुले राज्यबाट कुनै राहतसमेत नपाएको बरु उल्टै व्यवसाय नवीकरण दस्तुर बृद्धि गरेर सरकारले घाँटी मिच्ने कार्य गरेको भन्दै व्यवसाय सुचारु ग्र्ने वातावरण बनाईदिन आग्रह गरे ।
यसैगरी नेपाल नाई संघका अध्यक्ष सुधिर ठाकुर, उपाध्यक्ष सतिस ठाकुर, सदस्यहरु नितेश ठाकुर, ललित ठाकुर, शोनु ठाकुरलगायतले सुरक्षा विधि अपनाएर व्यवसाय संचालन गर्न सरकारसँग माग गरेका छन् ।
संघका अध्यक्ष विजय सन्तोषी राईको अध्यक्षतामा सम्पन्न कार्यक्रममा वरिष्ठ उपाध्यक्ष मन कुमारी तितुङ्गले कार्यक्रमको वारेमा जानकारी गराएका थिए । यस्तै पत्रकार महासंघका अध्यक्ष राजेश्वरबहादुर श्रेष्ठ, घरेलु तथा साना उद्योग महासंघका केन्द्रिय सदस्य रेणु श्रेष्ठ लगायतले लकडाउनका कारण व्यवसाय संकटमा परेकाले राज्यले सहयोग गर्नु पर्नेमा जोड दिएका थिए ।