धनकुटा ५ असोज । डा. रामप्रसाद पोखरेल आँखा अस्पतालमा अब दैनिक आँखाको शल्यक्रिया (अप्रेशन ) हुन थालेको छ । पहिले हप्ताको एक दिन मात्र शल्यक्रिया हुदै आएकोमा अब दैनिक हुन थालेको नेपाल नेत्रज्योती संघका सभापति रोशेष श्रेष्ठले जानकारी दिए । आँखा उपचारलाई अझ प्रभावकारी र गुणस्तरीय बनाउँदै जाने क्रममा ओपीडीमा दैनिक नेत्र चिकित्सकहरुले आँखा जाँच गरी आवश्यकताअनुसार दैनिक शल्यक्रिया गर्न थालिएको छ ।
सो कुरा संघमा आयोजित एक कार्यक्रममा सभापति श्रेष्ठले दिएका हुन् । सो अवसरमा संघको कार्यालय कक्ष निर्माण गर्न निवर्ततान सभापति तथा केन्द्रिय कोषाध्यक्ष द्रोणप्रसाद गुरागाईबाट १ लाख ५० हजार रुपैया प्रदान गरेका छन् ।
गुरागाईले संघको कार्यालय कक्ष निर्माण गर्नका लागी खर्च भएको एक लाख ५० हजार रुपैया सहयोग स्वरुप संघका सभापति रोशेष श्रेष्ठलाई प्रदान गरेको संघका प्रचार प्रसार समितिका संयोजक विजय सन्तोषी राईले जानकारी दिए ।
संघका आज बसेको बैठकमा संघका केन्द्रिय कोषाध्यक्ष द्रोण गुरागाई, सचिव देव बहादुर खड्का, कोषाध्यक्ष पुरेन्द्रलाल श्रेष्ठ, सहकोषाध्यक्ष जयन्द्र प्रधान, आँखा अस्पताल विकास समितिका अध्यक्ष लिलानाथ मिश्र, संघका सदस्यहरु प्रकाश श्रेष्ठ, सुनिल डंगोल, ऋषिराम ढंगाना, विजयसन्तोषी राई, रेणु श्रेष्ठ, डा.इशा श्रेष्ठ, प्रशासन प्रमुख नरेन्द्र वस्नेतलगायतले आँखा उपचार सेवालाई धनकुटामा थप गुणस्तरीय बनाउँदै लाने बताए ।
सो अवसरमा आँखा उपचार सेवालाई अत्याधुनिक प्रविधिबाट सेवा विस्तार गरिने सचिव देवबहादुर खड्काले बताए । सेवा विस्तारका लागि पूर्वमन्त्री सुनिलबहादुर थापाको पहलमा हिमालयन बैंकबाट ३५ लाख मूल्य बराबरको आधुनिक शल्यक्रिया गर्ने मेसिन प्राप्त हुने सभापति श्रेष्ठले जानकारी दिए ।
