धनकुटा ९ असोज । लामो समयको लकडाउनले संकटमा परेको व्यवसायीहरुलाई सहयोग गर्दै घरभाडा आजसम्म ३ सय २४ घरधनीहरुले भाडा छुट दिएको छन् । सो सम्बन्धि जानकारी धनकुटा उद्योग बाणिज्य संघले आज प्रेस विज्ञप्ती जारी गरी दिएको छ ।
संघका अध्यक्ष विजयसन्तोषी राई र महासचिव रामबहादुर गोङ्वाद्वारा हस्ताक्षरित विज्ञप्तीमा कोरोना भाईरस (कोभिड १९) नियन्त्रणका लागी सरकारले लगाएको लकडाउनका कारण उद्योग, व्यापार, व्यवसाय बन्द हुदाँ चरम आर्थिक सकंटमा परिरहेका व्यवसायीहरुलाई घरभाडा छुट गरी महत्वपूर्ण सहयोग गरी दुःखमा गुन लगाएको भनि उल्लेख छ ।
विज्ञप्तीमा सबै मनकारी घरधनीहरु तथा धनकुटा नगरपालिका, धनकुटा अस्पताल, त्रिवेणी मावि, नेपाल पत्रकार महासंघ, समाज कल्याण संस्था, नेपाल निर्माण व्यवसायी संघलगायतका संस्थाहरुले भाडा छुट गरी यो पीडाको घडीमा राहत दिएको उल्लेख गरेको छ । यसरी २ महिनादेखि ५ महिनासम्मको घरभाडा छुट दिएको विज्ञप्तीमा उल्लेख छ ।
संघले छुट दिने घरधनी तथा संस्थाहरुलाई यस अघि नै सम्मान गरेको छ । साथै सम्मान गर्न बाकी सबैलाई विशेष समारोहका वीच सम्मान गरिने संघका अध्यक्ष विजयसन्तोषी राईले जानकारी दिए ।
