धनकुटा असोज १० । कृषि पर्यटन प्रबद्र्धनमा महिला अभियान धनकुटाको आयोजना तथा धनकुटा महिला बचत तथा ऋण सहकारी संस्थाको सहआयोजनामा रक्तदान कार्यक्रम सम्पन्न भएको छ । सो अवसरमा ८१ जना रक्तदाताहरुले रक्तदान गरेको आयोजक समितिका अध्यक्ष तारा तितुङले जानकारी दिए । रक्तदान ५७ जना पुरुष र २४ जना महिलाले गरेका थिए । संकलित रगत विराटनगरस्थित ब्लड बैंकमा पठाईने अध्यक्ष तितुङले जानकारी दिए ।
कार्यक्रमको उद्घाटन प्रमुख अतिथि तथा प्रदेश १ विधायन समितिका संयोजक इन्द्रमणी पराजुलीले पानसमा बत्ती वालेर गरेका थिए । सो अवसरमा सांसद पराजुलीले अहिलेको कोभिड १९ को महामारीको समयमा देशभर रगतको अभाव भईरहेको अवस्थामा अभियानले यस पवित्र कार्यको थालनी गरेकोमा संस्थाको प्रशंसा गरे । उनले रगतको अभावमा कसैले पनि अकालमा ज्यान गुमाउन नपरोस् भन्दै आगामी दिनमा पनि यस्तै पवित्र जनहितको कार्यमा संस्था सधै क्रियाशील रहन आग्रह समेत गरे ।
यस्तै सो अवसरमा प्रदेश सांसद निरन राईले कोरोना भाईरसको संक्रमणको कारण रक्तदान कार्यक्रम आयोजना हुन नसक्दा देशभर रगतको अभाव भएको जानकारी दिए । उनले यस्तो समयमा पनि उत्साहका साथ रक्तदान गर्न आएका रक्तदाताहरुलाई धन्यवाद दिए । यस्तै सांसद कुसुम श्रेष्ठ (जुली) ले रक्तदान जीवनदान भएको उल्लेख गर्दै रक्तदान गर्ने दाताहरुले धेरैको ज्यान बचाउने बताए । उनले यस पवित्र कार्यको आयोजना गरेकोमा आयोजक संस्थालाई धन्यवाद दिए ।
सो अवसरमा धनकुटा उद्योग वाणिज्य संघका अध्यक्ष विजयसन्तोषी राई, घरेलु उद्योग महासंघका केन्द्रिय सदस्य रेणु श्रेष्ठले शुभकामना मन्तव्य राखेका थिए ।
संस्थाको अध्यक्ष तारा तितुङको अध्यक्षतामा सञ्चालन भएको उद्घाटन कार्यक्रमको सञ्चालन संस्थाका सचिव अस्मिका राईले गरेका थिए ।
कार्यक्रमको नेपाल रेडक्रस सोसाईटी धनकुटा शाखाको प्राविधिक सहयोग रहेको थियो । यस्तै कार्यक्रमको सहयोगी धनकुटा नगरपालिका रहेको थियो ।
यस्तै अन्य सहयोगहरुमा नेपाल प्रहरी, सशस्त्र प्रहरी बल, धनकुटा वितरक संघ, निर्माण व्यवसायी संघ रहेको आयोजक समितिले जनाएको छ ।
