धनकुटा । धनकुटाको पुरानो महेन्द्र पार्क पुनर्निर्माण हुने भएको छ । धनकुटा नगरपालिका वडा नं. ६ का वडाध्यक्ष नरेश श्रेष्ठको अध्यक्षतामा सम्पन्न भेलाले सो निर्णय गरेको हो ।
सल्लेरी बनस्थित सो पार्क पुनर्निर्माणका लागि वडासदस्य मिलन खड्गीको अध्यक्षतामा ९ सदस्यीय महोन्द्र पार्क निर्माण समिति गठन गरिएको छ । सो समसतको उपाध्यक्षमा वडा सदस्य बेणुबहादुर बस्नेत, सचिवमा राजेश्वरबहादुर श्रेष्ठ र कोषाध्यक्षमा ब्यञ्जना पोखरेल रहेका छन् ।
यस्तै समितिका सदस्यहरुमा वडासदस्यद्वय हिरादेवी राई र मुना रम्तेल, मुर्तिकार श्रीकृष्ण जोशी, इतिहासविद् ठाकुरप्रसाद बराल र लीला मिश्र रहेका छन् । समितिले देशविदेशमा रहेका धनकुटेलीहरुको सहयोगमा सो पार्क पुनर्निर्माण गर्न पहल गर्ने जनाएको छ ।
पार्कको पहिलेको अवस्थाको डिजाईन तयार गरिएको मुर्तिकार तथा समितिका सदस्य श्रीकृष्ण जोशीले जानकारी दिए ।
समिति गठनसँगै पार्कको पहिलेको इनारको स्वरुप र पार्क वरिपरी सरसफाई गरिएको सदस्य ठाकुरप्रसाद बरालले जानकारी दिए । सरसफाई बरखगण सल्लेरी ब्यारेकाका सेनाहरुको सहयोगमा गरिएको छ । यस्तै सेनाद्वारा पार्कबाट सडक आउने गोरेटो बाटो पनि सरसफाई गरिएको छ ।
सो पार्कलाई पहिलेकै स्वरुपमा पुनर्निर्माण गरिने समितिको अध्यक्ष मिलन खड्गीले जानकारी दिए ।
